Zaintza publiko duinaren aldeko protestek ez dute etenik
Bihar goizean bilera egingo dute herri eragileen ordezkaritza batek eta Gipuzkoako Foru Aldundiko Gizarte Politiketako sailarekin.
Elkarretaratzeak Jesusen Bihotza eta Sanmarkosene egoitzen aurrean. Argazkiak: Duintasuna Sanmarkosene eta Jesusen Bihotza adinekoen egoitzetako egoera kezkaz bizitzen ari dira langile, erabiltzaile eta horien senideek. Ez da gutxiagorako, langile falta eta ondorioz, arta egoki eta duina eskaintzeko ezintasuna mahaigaineratu dute azken asteetan. Horren harira, aterabide egokia eta zaintza publiko duina bermatzeko protestak egiten ari dira.
Astelehenean erresidentzietako egoera lehen lerroan jarri zuten Duintasunaren elkarretaratze eta manifestazioan. Atzo berriz, astero moduan, elkarretaratzea egin zuten Sanmarkosene aurrean langile eta erabiltzaileen senideek, eta gaur, Jesusen Bihotzaren egoitzako langile eta senideek egin dute protesta. Sanmarkosenen asteazkenero elkarretaratzen dira 10:45ean hasita, eta Jesusen Bihotzaren egoitza aurrean, ostegunero 11:00etatik aurrera.
Duintasunak gainera, elkarretaratzeak egingo ditu hilabete honetako astelehenetan Zumardiko azoka txikian eta Niessen Merkatalguneko sarreran.
Aldundiarekin bilera
Protestek lehen emaitza izan dutela jakinarazi zuten pasa den astelehenean gaiaren gainean lanean ari diren herri eragileek. Oreretako Mugimendu feminista, auzo elkarteak, Bilgune Feminista eta Duintasuna elkartea ari dira sare horretan. Gizpuzkoako Foru Aldundiak bilera eskaera egin zien gaiaz hitz egiteko. Bilera hori bihar goizean izango dute eragileek eta aldundiko Gizarte Politiketako sailak. Bilerak ematen duenaren berri jakinaraziko dute herri eragile horiek, baita aurrerantzean egin beharreko urratsak ezagutarazi ere.
Azkenik, deia egin diete herritarrei, antolatutako protestetan parte har dezaten, “argi dago mobilizazioak ezinbesteko tresna direla zaintza publiko duina bermatzeko”.
