Bere horretan jarraituko dute Euskadi etorbideko aldaketek
Adinberriko obretan "arazoak" izan direnez, aldaketa horiek mantentzea erabaki du Pasaiako Udalak.
Euskadi etorbideko lanak. Adinberriko obrak direla eta, azken asteetan esku hartzea egin dute Lasako bidegurutzetik gertu. Lan hauen ondorioz, aldaketak izan dira zirkulazioan zein oinezkoen mugikortasunean eta bere horretan jarraituko dutela jakinarazi berri du udalak, esku hartzean “arazoak” izan direlako. Hortaz, aldaketa horiek luzatzea erabaki dute.
Hala, ibilgailuen joan-etorriak bermatzeko bypassak bertan jarraituko du, eta trafikoa semaforo baten bidez arautzen jarraituko dute. Gainera, Udaltzaingoak trafikoa erregulatzean eta arintzen jarraituko du mugimendu gehien dagoen orduetan, bereziki goizeko lehen orduetan.
Lanei dagokionez, Añaberko lotuneak konektatzeko indusketak egiten ari dira, eta hainbat operadoreren kutxatilak jartzen ari dira. Lan horiek Adinberriko obraren itxituratik hurbilen dagoen espaloiaren zati bati ere eragin diote, baina azken asteetan bezala, oinezkoen pasabidea bermatuko dute.
Lanak hil honetan bukatzea aurreikusi dute. Informazio gehiago jasotzeko 635 25 80 51 telefono zenbakira deitu daiteke.
