Larrialdiko bi simulakro egingo dituzte Pasaiako portuan bihar
Goizean lehergailu baten leherketa simulatuko dute, eta arratsaldean, berriz, ontzi batetik hidrokarburoa isuriko dela simulatuko dute.
Pasaiako Portu Agintaritzak (PPA) larrialdiko bi simulakro egingo ditu bihar (hilak 16), “larrialdi egoerak ahalik eta azkarren kontrolatzen” jakiteko asmoz. Goizean izango da lehena, 10:30ean. Lehergailu baten leherketa simulatuko dute, eta zauritu bat helikopteroz eramango dute. Lehen entsegu honen helburua “portuaren autobabeserako planaren ezarpenean sakontzea” dela diote portuko iturriek, “bai eta barneko eta kanpoko abisuak egitea, beste plan batzuekiko koordinazioa eta kanpoko larrialdi zerbitzuekiko koordinazioa ere”.
Arratsaldean, berriz, kai batean dagoen ontzi batetik hidrokarburoa isuriko dela simulatuko dute. Honetan amarratzaileek, praktikoek eta atoiontziek parte hartuko dute, baita hondakinen enpresa kudeatzaileak ere. Ekintza honek, bestalde, itsas kutsaduraren kontra borrokatzeko bitartekoen erabilera egiaztatzea ahalbidetuko duela diote portuko iturriek.
