Oiartzungo museoak doan bisitatu ahal izango dira larunbatean
Arditurrin, Luberrin, Soinuenean eta Arizmendienean doan sartu ahal izango da. Udalak herriko ondarea ezagutzera animatu ditu herritarrak.
Gaur aurkeztu dute Gipuzkoako museoen eguna. Tartean zeuden Oiartzungo Udaleko ordezkariak eta Aia Harrikoak. Datorren larunbatean —hilak 18— Museoen Nazioarteko Eguna ospatuko da Gipuzkoan. Tartean da Oiartzun. Gaur aurkeztu dute ospakizuna, Donostian. Udaleko eta Aiako Harria Natura Parkeko ordezkariak izan dira bertan.
Museoak hezkuntzaren eta ikerketaren alde izango da aurtengo ekitaldiaren leloa. Oiartzungo Udalak herritarrak animatu ditu, herrian dauden museoak bisita ditzaten. Gauzak errazago izango dituzte oiartzuarrek zein bisitariek: museoetara sartzeko sarrera doan izango da.
Herriko museoen eskaintzari errepasoa emanda gonbidatu dituzte herritarrak bertara joan daitezen.
- Arditurriko meatze-gunea: Sar zaitez meatze-barruti zoragarri honen historiaren sakonean. Ezagutu ia 2.000 urtez martxan egon diren galeriak eta Interpretazio Zentro bihurtutako laborategi zaharra. Museoen nazioarteko eguna dela eta, larunbat honetan bisita guztiak doan izango dira. Webgunean hartu behar dira sarrerak.
- Luberri, geologia museoa: Ezagutu ezazu Oiartzungo bailarako eta Euskal Herri osoko historia geologikoa, eta aurkitu inguru horretan bildutako fosilen erregistro zabala. Maiatzaren 18an museoa bisitatu ahal izango duzu doako sarrera batekin, bisita gidatua barne.
- Soinuenea, Herri Musikaren Txokoa: Bisita ezazu Euskal Herriko eta mundu osoko 400 instrumentu baino gehiagorekin osatutako erakusketa. Museoen nazioarteko egun hau bost kontinenteetako erritmoen doinuak dantzatzen ospatu ezazu. Museora sarrera eta bisitaldian audio gida zerbitzua doakoa izango da egun honetan.
- Arizmendienea Etxe-Museoa: XVIII. mendeko eraikin hau XX. mende hasierako euskal burgesiaren opor-etxebizitzaren adibide garbia da. Gelaz gela, garai hartako portaera sozialak ulertu eta eguneroko bizitzaren ezaugarriak eta historiako hainbat pasarte ezagutu itzazu. Maiatzaren 18an ere, larunbatero bezala, doako bisita gidatua eskainiko da. Telefonoz deituta egin behar da erreserba: 943 494 521.
