Alabergako festetan gorputzak nork mugiaraziko dituen jakinarazi dute
Auzoko festetan arrakasta eman dioten formula errepikatuko dute: punk rock gaua lehendabizi, eta dantzagarriagoa bigarrena.
Radiocrimen Bilboko taldea arituko da gaur zortzi. Alabergako festak ate joka dira. Oraindik egitarau osoaren berri eman ez duten arren, musika eskaintza zein izango den jakinarazi du Alabergako Jai Batzordeak.
Azken urteetako formula errepikatuko dute aurten 65 urte beteko dituen auzoan. Ostiral gauean —hilaren 24an— punk rock kontzertuarekin gozatzeko aukera izango dute alabergarrek zein ingurutik hurbilduko diren bisitariek. Radiocrimen, Txapelpunk eta Mala Ruina taldeek kontzertua emango dute, MJ Krashek —iaz bezala— gaua girotu aurretik.
Larunbaterako, berriz, erritmo dantzagarrien alde egingo dute. Arratsaldean, Jesus Gilek —DJak, ez pertsonaia ilunak— hain boladan jarri den tardeoa girotuko du.
Gauean, berriz, Txiltxoko oiartzuarrak eta Iratzar erromeria taldearen txanda izango da, eta DJ Txillardegik itxiko du gaualdia.
