Nerea Intxausti herriko haurrekin izango da, 'Tere Batelera' ipuina kontatzen
Herrian arrastoa utzi duen ogibide historiko honen inguruko ipuina kaleratu berri du pasaitarrak. Hiru ipuin kontaketa saio eskainiko ditu.
Pasaiako haurrek herriko ondare historikoan sakonduko dute Nerea Intxausti Castiñeira kazetari eta idazlearekin. Kaleratu berri duen Tere Batelera ipuina kontatuko die herriko txikienei. Hiru emanaldi eskainiko ditu Intxaustik datozen asteetan.
Lehena datorren asteartean (hilak 21) izango da, Trintxerpe-San Pedroko ludotekan, 18:45ean, Asteazkenean (hilak 22) Donibaneko ludotekan izango da ipuin kontaketa (ordu berean); eta azkena, Antxoko ludotekak jasoko du, hilaren 28an (asteartea da), 18:45ean ere.
Herrian arrastoa utzi zuen ogibide historiko horren atzean zegoen lan nekaezina eta borroka islatu ditu sorkuntzan. Ainhoa Aizpuruaren ilustrazio koloretsuek biribildu dute argitalpena. Lotura honetan ipuinaren gaineko erreportajea irakur daiteke.
