Elorsoron hasiko da txapelerako bidea; eztanda egin behar du harmailak
Areto futboleko bi taldeek finalerdiak jokatuko dituzte asteburuan. Bi partidak etxean jokatuko dituzte OKEko taldeek, gaur arratsaldean.
Elorsororen bultzadarekin aurrera atera nahi dituzte kanporaketak. Oiartzun Kirol Elkarteko areto futboleko bi taldeek denboraldi erregular bikaina egin dute. Biak ala biak izan dira beraien txapelketetan puntu gehien lortu dituzten taldeak (Miren Tabernak Ttakunekin partekatuta).
Ligako lanak bikain eginda, orain hil ala biziko fasearen txanda da. Bi taldeek kanporaketak jokatuko dituzte norberaren mailako finalera iristeko. Oiartzun KE lehenengo postuan geratu zenez, eta Miren Taberna bigarrenean, finalerdia etxean jokatzeko aukera lortu zuten.
Bi partidak gaur arratsaldean jokatuko dituzte. Kantxa faktorea probestu nahi du Oiartzun Kirol Elkarteak, eta Elorsoro eltze bero bilakatu.
Lehen partida Miren Tabernak jokatuko du, 18:45ean hasita. Makax Gorka Margoak izango dute arerio, hirugarren sailkatu zirenak. Ligako balantzea ikusita, donostiarrak dira faborito, Miren Tabernak haien kantxan galdu eta etxean berdindu baitzuen. Hala ere, gaurkoa ez da iraganera begiratzeko eguna, etorkizunera baizik.
Bigarren partida 20:20an jarri dute. Oiartzun Kirol Elkarteak Idiazabal BaiReformas izango du kontrario. Aurreko asteburuan jokatu zuten elkarren kontra, Goierriko herrian, eta launa berdindu zuten. Oiartzunen jokatu zutenean, urtarril jada urrun hartan, etxekoak nagusitu ziren 8-3ko emaitzagatik.
Oiartzungo bi taldeek beraien partidak irabazten dituzte, finalera iritsiko dira. Lehen taldeak Pasaiako Afantxo edo Ibarrako Lauburu izango du arerio finalean. Miren Tabernak Azkoitiko Ttakun eta Bilkoin Legorretaren arteko finalaurrekotik ateratzen denaren kontra jokatu beharko du txapela.
Gizonezkoen Ohorezko Erregional Maila
- Aretxabaleta — Oiartzun: etzi, 16:30ean, Ibarra futbol zelaian.
Emakumeen Euskal Liga
- Oiartzun — Aranbizkarra: etzi, 17:00etan, Karla Lekuonako zelai txikian.
Gizonen Lehen Erregionala. Kopa M-1.
- Oiartzun B — Landetxa: bihar, 18:00etan, Karla Lekuonako futbol zelai txikian.
Emakumeen Ohorezko Erregional Maila
- Urola — Oiartzun C: bihar, 12:00etan, Zumarragako Argixao futbol zelaian.
Mutilen Gazte Mailako Euskal Liga
- Oiartzun — Añorga: bihar, 16:00etan, Karla Lekuonako zelai txikian.
Mutilen Gazte Mailako Gorengo Maila
- Oiartzun B — Touring B: bihar, 15:30ean, Karla Lekuonako zelai txikian.
Mutilen Gazte Maila. Gipuzkoako Kopa: M1.
- Oiartzun C — Usurbil B: etzi, 11:00etan, Karla Lekuonako zelai txikian.
ARETO FUTBOLA
Gizonen Gipuzkoako Lehen Maila
- Oiartzunek jokatzen duen ligan atseden hartuko dute.
Gizonen Gipuzkoako Bigarren Maila
- Altza La Terraza — Miren Taberna OKE: etzi, 10:40an, Altzako kiroldegian.
