Sanferminak iragarriko dituen kartelaren bila hasi dira
Uztailaren 4tik 8ra ospatuko diren jaiek kartela behar dute. Hilaren 31ra bitarte aurkeztu daitezke irudi proposamenak.
Iazko jaien hasierako irudi bat. Uztailaren 4an abiatuko diren sanferminei begira jarri da dagoeneko udala. Aurtengo festak iragarriko dituen kartelaren bila hasi da, eta herritarrak lehiaketa honetan parte hartzera animatu ditu erakundeak.
Pasaian jaio edo bizi den edonork ahalko du proposamena bidali. DIN-A3 neurrian aurkeztu beharko dira irudiak, eta edozein modalitate artistiko erabil daiteke. Hori bai, honako esaldiak agertu beharko du kartelean: “San Fermin Jaiak-Pasai Antxo 2024. Uztailaren 4tik 8ra”.
Ez da egilearen sinadura edo bestelako zehaztasunik jarri beharko. Kartelarekin batera kartazal itxi bat aurkeztu beharko da, eta barruan egilearen izen-abizenak, helbide eta telefonoa zehaztu beharko dira. Hilaren 31 (ostirala) izango da irudi originalak aurkezteko azken eguna, Trintxerpeko Kultura eta Hezkuntza Sailean edo Pasai Antxoko HAZeko bulegoan aurkez daitezke.
Jai Batzordea arduratuko da kartel irabazlea aukeratzeaz, eta bere jabetzapean geratuko da irudi irabazlea. Kartel onena egiten duenak 200 euroko sariaz gain, Mimos tabernan bi lagunentzako bazkari bana jasoko ditu opari.
