Meipiko jaiek eragina izango dute trafikoan
Ostiraletik igandera bitarte mozketak izango dira Donibaneko sarreran eta irteeran.
Asteburu honetan festak eztanda egingo du Meipin. Ostiraletik igandera bitarte festa izango da nagusi auzoan, eta antolatu dituzten ekintza eta ekitaldiengatik, aldaketak izango dira trafikoan. Pasaiako Udalak jakinarazi berri duenez, Lezo Bide kalea moztuko dute ostiraleko 16:00etatik igandeko 23:55ak arte. Hortaz, Donibaneko sarrera eta irteera Larrabidetik egin beharko dira, eta autobusak Meipiko biribilgunean izango du geltokia, aipatutako egun eta ordutegi horren barruan.
Ostiraleko Puro Relajoren kontzertua dela eta, Donibanerako sarbidea mugatuko dute, egoiliarrak bakarrik ahalko dira sartu.
Informazio eta xehetasun gehiago jasotzeko udaltzaingora deitu daiteke, 943 00 43 00 telefono zenbakira.
Meipiko jaien egitaraua:
Ostirala (hilak 24):
- 17:30: Haurrentzako jolasak eta tailerrak, Kuadrillategiren eskutik.
- 18:45: Elektrobuiaka elektrotxaragaren emanaldia Meipin, Kuadrillategik antolatuta.
- 19:00: Pasai Txaranga auzoan barrena ibiliko da.
- 19:45: Omenaldia egingo diote Joaquin Azpillaga ‘Txintxo’-ri. Lintxua Dantza Taldekoek agurra dantzatuko diote.
- 20:00: Jaien hasiera alkate txikiekin. Jarraian, buruhandiak eta Pasaia Txarangako kideak ariko dira.
- 22:00: Puro Relajoren kontzertua. Jarraian, DJ Kabuxa.
Larunbata (hilak 25):
- 11:00: Toka txapelketa.
- 11:30: Patata tortilla txapelketa.
- 12:00: Kantujira auzoan barrena.
- 12:00: Muxikoak Meipin.
- 16:00: Mus txapelketa.
- 17:00: Haur jolasak, RK Gazte Elkartearen eskutik. Jarraian, askaria.
- 18:30: Herri danborrada Meipi Band Txarangarekin.
- 20:30: Burrunba elektrotxaranga.
- 23:00: DJ Naza.
Igandea (hilak 26):
- 11:30: Kalejira Itsas Mendiko txistulariekin.
- 13:00: Kostantzia Itsas Mendiko Bandaren kontzertu mexikarra.
- 14:30: Herri bazkaria, Komando Zuritoren laguntzarekin
- 16:30: Rifaren zozketa. Jarraian, bingoa.
- 18:00: Erromeria 3ttu taldearekin.
- 21:00: Jaien bukaerako traka botako dute.
