Adinekoen behar, interes eta kezkak ulertzeko diagnostikoa egingo du udalak
Pasaiako 65 urtetik gorako pertsonen "beharrak eta dinamikak hobeto ulertzeko" asmoz, ikerketa bat egingo dute. Honi esker "politika eta programa eraginkorragoak" garatu ahal izango dituzte.
Pasaiako 65 urtetik gorako pertsonen “beharrak eta dinamikak hobeto ulertzeko” asmoz, diagnostiko berri bat abiatuko du udalak. Aintzane Taberna Gizarte Ekintzako zinegotziaren arabera, ikerketa honi esker “politika eta programa eraginkorragoak” garatu ahal izango dituzte, “pertsona nagusien egungo premietan oinarrituta”. Datuetara jo du zinegotziak: Pasaiak 16.658 biztanle ditu, eta horietatik %21,70ek 65 urtetik gora ditu. Udalarentzat funtsezkoa da adinekoek gaur egun dituzten “errealitateak eta erronkak ulertzea”.
Bizipozen lankidetzarekin, bizi baldintzak, eskura dituzten zerbitzuak eta talde demografiko horren eskaerak ebaluatuko dituzte, azterlan sakon bat eginez. Diagnostikoak honako puntuak izango ditu ardatz: udalerrian bizi diren pertsona nagusien bizi baldintzak aztertzea eta diagnostikatzea; behar eta interes espezifikoak ezagutzea; gaur egun erabilgarri dauden zerbitzuak ebaluatzea; eta jubilatuen elkarteetako zuzendaritza batzordeetarako kide berriak identifikatzea eta biltzea, lidergo komunitarioa indartzeko asmoz.
Informazio guzti hori biltzeko bilkurak antolatu dituzte lau barrutietan. Azterlan honetan parte hartu nahi dutenei deialdia luzatu diete, bilera irekietan parte har dezaten. Momentuz, bi bilera antolatu dituzte: hilaren 27an (astelehena da) Antxoko Zaharren Tokian (Axular kalea, 4) eta ekainaren 6an (osteguna da) Trintxerpeko Jubilatuen Elkartean (Marinel kalea, 3). 17:00etan hasiko dituzte bilerak, eta bi ordu inguruko iraupena izango dute.
Ondorengo gaiak eztabaidatuko dituzte bertaratzen diren adinekoek: hobekuntza arloak; jubilatuen elkarteentzako eta gizarte eragileentzako erronkak; zerbitzu soziosanitarioak; pertsona nagusien pertzepzioak; kultura, hezkuntza, aisia eta kirol eskaintza; belaunaldien arteko harremanen sustapena; eta nahiz ez den bakardadearen prebentzioa.
“Diagnostiko hau funtsezko urratsa da Pasaiako pertsona nagusien benetako beharretara egokitutako programa inklusiboagoak diseinatzeko”, erantsi du Tabernak. Udalak prozesuan parte hartzera gonbidatu ditu herriko adinekoak, “bizi kalitatea hobetzen eta udalerriko gizarte sarea sendotzen laguntzeko”, esan du azkenik.
