Urkabe mendia BTTentzako izango da asteburuan
Oiartzungo Sari Nagusia jokatuko dute larunbat arratsalde eta igande goizean, OTXEk antolatuta. Txapelak banatzeaz gain, giro ona ere hedatu nahi dute.
Atzo aurkeztu zuten Oiartzungo Sari Nagusia. OTXEk antolatuta, asteburuan ospatuko da Oiartzungo BTT Sari Nagusia, eta Euskadiko eta Gipuzkoako txapelketak barnebilduko ditu. Hiru podium izango dira, beraz.
Atzo aurkeztu zuten sariketa, Landetxe plazan. Hainbat kategoriako txirrindulariak lehiatuko dira Urkabe mendian. Aurreko urteetan bezala, bi egunetan zatituko da sari nagusia. OTXEk prestatu duen zirkuituak 4,5 kilometroko luzera izango du.
Larunbat arratsaldean, 16:30ean hasita, kimu eta haur mailetako mendi txirrindulariak lehiatuko dira. Lasterketa bukatzen denean, askaria izango dute bertako zein kanpoko txirrindulariek, OTXEko gurasoek gonbidatuta. “Jai giroan ospatuko dute. Guretzako, lehiaketa baino gehiago, helburua da Gipuzkoako gainontzeko eskolei parte hartzea zabaltzea”, esan zuen Arkaitz Iza OTXEko kideak. Kantina ere jarriko dutela gaineratu dute, hurbiltzen diren guztientzako.
Igandeko saioa, berriz, goizez egingo dute. 10:00etan, neska, kadete eta Master 40 kategoriakoen txanda izango da. 12:00etatik aurrera lehiatuko dira Elite, 23 urtez azpiko, junior eta Master 30 mailetakoak.
OTXEk gogorarazi duenez, izena emateko aukera oraindik zabalik dago, federatuentzat. Horretarako, Euskadiko Txirrindularitza Federazioaren webgunera joan beharko da. Orain arte 130etik gora dira izena eman duten txirrindulariak.
Gida teknikoa kontsulta daiteke, OTXEren webgunean. Oiartzungo Sari Nagusiaren xehetasun ugari jarri dituzte gisa tekniko horretan: bertara iristeko argibideak, ordutegiak, zirkuitua, anoa-puntuak, ibilgailuak uzteko tokiak…
Udaleko ordezkari gisa Ibon Mitxelena zinegotzia hurbildu zen prentsaurrekora. Adierazi zuenez, Oiartzungo Udalak atseginez ikusten du asteburukoa, kirola sustatuko duen ekintza delako. “Eguna giro onean pasatzea opa diegu. Euskal Herriko beste herrietako jendea etorriko delako pozik gaude. Lehiakortasuna egongo da, baina baita giro polita ere”, gaineratu zuen Mitxelenak.
Gazteen artean “masiboa ez den” kirol bat sustatzea modu positiboan ikusten du udalak, eta eurek beti daudela hori bultzatzeko prest.
Udalekuak
Asteburuko probez gain, txirrindularitza sustatzeko asmoz, udalekuak antolatu ditu OTXEk, Uda Bike Eskola izenarekin. Ekainaren 17tik irailaren 6ra bitartean, bosna eguneko ikastaroak eskainiko dituzte Bike Eskolan. Teknika XC, All Mountain edo Enduro bizikleta modalitate aukera egongo dela jakinarazi du OTXEk.
Izena emateko, ikastaroa izan baino astebete lehenagora arte izango da epea, baldin eta ikastaroko taldea ez den itxi (hamabi kidek osatuko dute).
OTXEren webgunean eman daiteke izena, eta joan nahi den astearen arabera aukera daiteke. Uda Bike Eskolari buruzko informazio gehiago bertan aurki daiteke.
Prezioak eta Ordutegiak:
- Udalekuak: 45 euro astelehenetik ostiralera 9:00etatik 13:00etara. Kanpilon teknika ikasi, irteera gidatuak egin eta ongi pasatzeko aukera.
- Enduro astea: 60 euro maila altuko ikastaro espezifikoa. Modalitate horretan hobetu nahi duenarentzat, Enduro jaitsierak eskainiko dituzte, saltoak eta teknika hobetuz. Modalitatean lehiatzen hasi nahi duenari zuzendua dago. Astelehenetik ostiralera izango da, 9:30etatik 12:30etara.
