Urmendi Eguna ospatuko dute, giro "goxo eta politean"
Haur eskolako komunitatea eraikin nagusian elkartuko da hilaren 26ko goizean, umeek —batez ere— goza dezaten.
Ikasturtea bukatzen ari da, eta urtero bezala, Urmendi haur eskolak urteroko festa ospatuko du. 2023/24 ikasturteari dagokiona datorren igandean izango da, hilak 26.
Iraia Etxebeste Madariaga Urmendiko zuzendariak Oiartzun Irratian eman ditu komunitatea batuko duen egunaren xehetasunak. 10:30ean hasiko dira, ohitura bilakatu den antzerkiarekin; haur eskolako guraso direnek eta izan direnek egingo dituzte aktore-lanak.
Ondoren, haurrek ordubeteko —edo gehixeagoko— tartea izango dute prestatuko dituzten txokoetan parte hartzeko. Urmendi Eguneko klasikoak dira, eta “arrakasta” handia dutela ziurtatu du Etxebestek: taloen txokoa, sormen-txokoa, gozo-txokoa, aurpegia margotzekoa eta fruten txokoa. Eguna oroimenean iltzatua utziko duen photocall-ak ez du hutsik egingo.
Tortillek, pizzek eta abar osatuko duten hamaiketakoarekin bukatuko dute aurtengo Urmendi Eguna. Etxebestek azaldu duenez, helburua da haurrek ongi pasatzea eta komunitate moduan parte hartzea, kohesioa emanez. Herritar guztiak animatu dituzte bertara hurbil daitezen, giro “goxo eta politean” goiza pasatzera.
