Jurgi Ekizaren doinuak, igandean Trintxerpen
Jurgi Ekiza musikari eta kantariak kontzertua eskainiko du igandean alkateordetzan, 19:00etan. Online sarrerak agortu badira ere, emanaldia hasi baino ordu erdi lehenago sarrera gutxi batzuk txarteldegian eskuratu ahal izango dira.
Kontu Kantari, Pasaiako solasaldi musikatuak zikloaren barruan, Jurgi Ekiza musikari eta kantari lapurtarrak kontzertua eskainiko du igandean (hilak 26) Trintxerpeko Alkateordetzako areto nagusian, 19:00etan. Ekizak bere bakarkako proposamena aurkeztuko du Pasaian: Ekiza zuzenean. Honakoa esan zuen Aitor Brion Kultura zinegotziak aurkezpenean: “Bakarkako lan horretan bere alderdirik pertsonalena erakutsiko die pasaitarrei agertokian. Lapurtarrak pasioz eta gozotasunez interpretatzen ditu abestiak, instrumentuentzako trebetasun berezia du, ahots pertsonala du eta oso ondo egokitzen da bere abestiek eskatzen dituzten tonu eta erregistroetara”.
Kontzertuaz gain, nahi duen orok Jurgi Ekizari galderak egiteko aukera izango du. Galdera horiek Pasaiako Udalaren sare sozialen bidez helarazi behar dira. Interesgarrienak Ekizari formulatuko dizkiote igandeko saioan. Aurkezlea Alex Padilla izango da.
Udalak jakinarazi du online sarrerak agortu direla; hala ere, emanaldia hasi baino ordu erdi lehenago sarrera gutxi batzuk txarteldegian eskuratu ahal izango dira.
