Lokal hutsak bizitzaz betetzeko
Lokal hutsak mobilizatzeko diru laguntza lerro berria jarri du martxan udalak, bigarrenez. 175.000 euro bideratuko ditu horretara.
Otaegi eta Mazizior Errenkoaldeko kideekin eta aurreko deialdian diru laguntzaren onuradun izan zirenekin. Lokal hutsak bizitzaz bete nahi ditu udalak eta horri begira, bigarrenez, martxan jarri du diru laguntza lerroa. Osotara, 175.000 euro bideratuko ditu lokal hutsak mobilizatzeko. Erabakiaren atzean, aurreko deialdiaren arrakasta jarri du Aizpea Otaegi alkateak, “erantzun oso ona izan zuen. Hasieran 200.000 euro jarri genituen lokal hutsen mobilizaziorako, eta 290.000 eurora igo genuen eskaera kopurua ikusita”.
Aurreko deialdian, guztira 36 lokal mobilizatzeko diru laguntzak bideratu zituen udalak: Hogei lokal berri irekitzeko, goiko pisuetan zeuden hamar negozio kale mailara jaisteko, eta sei negozioren transmisioan laguntzeko.
Gaur ezagutzera eman duten diru laguntza berria udalaren ekimenez jarri dutela martxan esan du baina Errenteria-Oreretako Merkataritza eta Ostalaritzako Aholku Kontseiluaren oniritziarekin. Deialdia orain hasiko da baina 2025 urteko azaroaren 3ra arte izango da zabalik. Horrela bada, urte bete baino gehiago izango dute laguntza eskatu nahi dutenek eskaera hori bideratzeko.
Helburua negozio berriak jartzen laguntzea, transmisioa bermatzea, hutsik dauden lokalak erabilgarri eta martxan jartzea, eta batzuetan etxebizitzetan kokatuta dauden negozioak kalera jaistea. Eskatzaileek, 9.600 euro arteko laguntzak jasotzeko aukera izango dute deialdi berriaren bidez. Horietako 5.000 euro lokal hutsaren prestaketa eta mobilizaziorako hasierako gastuentzat; 3.600 euro lokal hutsaren alokairu edo eroste gastuentzat; eta 1.000 euro gehigarri hainbat faktoreen arabera—euskarazko arreta bermatzea, emakumeen parte hartzea bultzatzea, Errenkoaldeko kide izatea…—.
Zalantzak argitzeko udalarekin harremanetan jartzeko 010 eta 943 44 96 00 telefono zenbakietara dei dezakete interesdunek.
Ekiteko lagungarria
Agerraldian Leire Mazizior Garapen Ekonomikorako zinegotzia, Maika Martin Errenkoaldeko lehendakaria eta aurreko deialdiko diru laguntzen hainbat onuradun izan dira alkatearekin batera. Azken horiek beraien esperientziaz mintzo dira eta diru laguntzak egkiteko lagungarriak izan dituztela baieztatu. Saioa Matxain da onuradun izan denetako bat. Sai Suo moda estudioa du berak Maria de Lezo kalean, “diseinatzailea naiz eta nire lokalean nire bilduma ikus daiteke, joskintza eta patroigintza ikastaroak ematen ditut, eta neurrira josten dut arropa”. Bere kasuan, hutsa zegoen lokal batean zabaldu zuen negozioa.
Begoña Garagarzak Biteri kalean zabaldu du entzumen zentroa, Clinicaudio du izena. “Urte pilo egin ditut nire kontura aritzeko gogoz eta azkenean ausartu nintzen. Hau martxan jartzeko egin nuen lehenengotariko gauza Errenkoaldera joatea izan zen eta beraiek bideratu zidaten nituen laguntzen gaineko informazioa emanez. Egia esan, beraien eskutik joatea esperientzia ezin hobea izan da. Laguntzei dagokienean, oso onak dira eta hasteko ezinbestekoak, arnasa suposatzen du”. Bere kasuan, lokala ere hutsa zegoen.
Blume loradenda zabaldu du Susana Jimenezek Zumardirako sarreran, eta berak ere laguntza jaso zuen aurreko deialdian. Esperientzia “ilusionagarria” izaten ari dela dio, “beldurrez hasi nintzen, hasieran ez duzu argirik ikusten tunelaren bukaeran, baina gero hasten zara ikusten bezeroak errepikatzen hasten direla, eta funtzionatzen duela. Tokiko merkataritza mantentzea kosta egiten da, konpetentzia handia dugu. Hala ere, ilusi handiz ari naiz eta laguntzarekin pozik. Nire kasuan oso lagungarria izan da udaletik jasotako laguntza hori. Prestamua eskatu behar izan nuen inbertsiorako eta laguntzari esker horri aurre egin diot, oso garrantzitsua da laguntza. oso eskertuta nago”.
Lora denda zabaldu zuen lokala hutsik egon zen hiru hilabetez.
“Denek esfortzuak” egitea ezinbestekoa jo du Maika Martin Errenkoaldeko presidenteak, lokalak hutsik gelditu ez daitezen, “udala egiten ari dena, Errenkoaldek eta lokalen jabeek gure aldetik jarri behar dugu ekintzaileei ateak zabaltzeko, edota merkataritzan aritu nahi dutenei”. Horretatik harago, lokal hutsik ez izateak eta horietan jarduera ekonomikoa izateak eragina duela inguruarentzat ere esan du, “ekonomikoki, sozialki, edota herriari eta kaleei bizitza ematen diolako”.
Errenkoaldek laguntza eskaintzen diela diru laguntza horiek behar dituztenei “tramitazioan”, eta zabalkundea emanez, nabarmen jarri du, bestalde, “erraztu behar diegu bidea”.
