Finalerdia dute Allerruko Haur Mailakoek igandean
Herriko kirol elkarteko Haur Mailakoek Urolaren kontra jokatuko dute Udaberri Kopako finalerdia. Munttarperen emakumeek ere partida dute.
Kiroleko liga ia guztiak bukatu dira, bai ohiko ligak, nahiz kopak. Herrian badira, ordea, bi talde asteburuan jardunaldia izango dutenak. Horietako bat Allerru Kirol Elkartearen mutilen Haur Mailako (2010ean jaiotakoena) taldea da. Udaberri Koparen finalerdia jokatuko dute etzi (igandea) Zumarragako Argixao zelaian, 12:00etan hasita, bertako Urolaren kontra. Partidaren irabazlea finalera pasako da, partida bakarrekoa baita finalaren aurrekoa.
Jardunaldia izango duen herriko beste taldea Munttarperen emakumeen talde nagusia da. Haiek Federazio Kopako norgehiagoka izango dute, non eta Zumarragan, etzi gainera, Allerruko taldeak bezala. Eskubaloi jokalarien partida, ordea, 11:00etan hasiko da Ispillu kiroldegian.
Beraz, jarduera izango duten herriko bi taldeek Zumarragara bidaia egingo dute igandean.
