Oiartzuarrek Oñatin jokatuko dute areto futboleko txapela, larunbatean
Ibarrako Lauburu taldea izango da kontrarioa, ligan lehia estua izan duen taldea. Era berean, Karla Lekuona zelaiari omenaldia egingo diote, goizean.
![oiartzun ke areto futbola](https://oarsoaldea.hitza.eus/site/files/2024/05/oiartzun-ke-areto-futbola.jpg)
Oiartzun Kirol Elkartearentzako asteburu berezia izango da gaur hasiko dena, bai kirol arloan baita emozionalki ere. Kirol arloari dagokionez, areto futboleko Gipuzkoako Lehen Mailako finala jokatuko dute bihar arratsaldean. Oñatiko Zubikoa kiroldegian izango da, 17:45ean hasita.
Aurrean Lauburu Ibarra taldea izango dute. Denboraldi erregularrean nor baino nor aritu dira lehenengo postuaren bila, eta azkenean oiartzuarrek eraman zuten saria zakura. Biharkoa, baina, ez da diesel moduan egin beharreko etapa izango; hil ala bizikoa izango da: txapelduna erabakiko da.
Karla Lekuonari, omenaldia
Biharko beste fokua Karla Lekuonan jarriko dute. Bihar eguerdian Bergararen bisita jasoko du gizonen lehen taldeak, liga bukatzeko. Oiartzunen denboraldia ez da historia liburuetan jasota agertuko, sailkapenaren erdialdean geratuko baitira.
Hala ere, karga emozionala izango du biharko goizak. Izan ere, Karla Lekuona zelaiari belarra aldatuko diote, artifiziala jartzeko, beste hainbat eraberritzeren artean. Horregatik, klubak omenaldia eskainiko dio gotorleku izan denari (eta izaten jarraituko duena, baina beste itxura batekin).
Futbola, musika, jana eta edana izango dira goizean zehar. Egitaraua prest daukate aspalditik.
Gizonezkoen Ohorezko Erregional Maila
- Oiartzun — Bergara: bihar, 12:00etan, Karla Lekuona futbol zelaian.
Emakumeen Ohorezko Erregional Maila
- Oiartzun C — Beti Gazte: gaur, 19:30ean, Karla Lekuonako futbol zelai txikian.
ARETO FUTBOLA
Gizonen Gipuzkoako Lehen Maila
- Oiartzun — Lauburu Ibarra: bihar, 17:45ean, Oñatiko Zubikoa kiroldegian.