Bretoieraren alde korri egin dute oiartzuarrek, Mendikute gogoan
Oiartzungo ordezkaritza batek Ar Redadegeko bi kilometro egin ditu. Ondoren, harrera egin diete Karaezeko udaletxean.
Oiartzungo ordezkariak, Ar Redadegen. Oiartzungo ordezkaritza bat —Joana Mendiburu alkatea buru— Bretainian da. Hilaren 17an hasi zen Ar Redadeg bretoieraren aldeko lasterketa, eta gaur goizean bi kilometro egin dituzte oiartzuarrek. Zehazki, 1.846 eta 1.847 kilometroak egin dituzte.
Oiartzunek Karaezekin duen senidetzea dela eta joan dira bertara. “Gure hizkuntzen defentsak ere senidetzen gaitu eta horregatik, lasterketan parte hartu dute gaur goizean Joana Mendiburu alkateak, Agustin Lekuona zinegotziak eta herriko beste eragileetako ordezkariek”, adierazi du Oiartzungo Udalak.
Oiartzun-Karaez Senidetza Elkarteko, Oarsoaldeko AEK-ko eta Haurtzaro Ikastolako ordezkariak ere joan dira bertara.
Mendikute gogoan
Euskal Herriko ordezkaritzari harrera egin diete Karaezeko herriko etxean. Joxe Mari Mendikute gogoan izan dute, Oiartzun-Karaez Senidetza Batzordeko lehendakari izan zena. 2022ko abenduan hil zen.
Bi udalerrien arteko senidetzearen omenez, bretainiarrek intxaurrondo bat eskatu zieten oiartzuarrei, Karaezen landatu eta Mendikuteren oroimena betikotzeko. Urte luzez egindako lana eskertu nahi dute modu horretan.
Bihar bukatuko da
Ar Redadeg pasa den ostiralean hasi zen Raz lurmuturrean, eta 2.222 kilometro osatu ondoren, bihar iritsiko da Montroulezeraino (Morlaix). Treuzkas! (Pasa ezazu!) leloa izan da antolatzaileek aurtengorako aukeratu dutena.
Korrikaren eredua jarraituz sortu zuten
