Ategorrietako sarraskian hildakoak gogoratzeko lau konpromiso hartu ditu udalak
Gaur 93 urte bete dira Guardia Zibilak zazpi marinel eta arrantzale tiroz hil zituenetik. Lore eskaintza egin dute alderdi guztietako ordezkariek Trintxerpeko alkateordetzan. zorigaiztoko manifestazio hura abiatu zen lekuan.
Gaur (hilak 27) 93 urte bete dira Ategorrietako sarraskitik. 1931ko maiatzaren 27an Guardia Zibilak itsasoko zazpi langile hil eta beste zenbait zauritu zituen. Hildakoen eta haien senideen “oroimena ohoratzeko eta gogoratzeko” ekitaldia egin dute gaur Trintxerpeko alkateordetzaren kanpoaldean, inguru hartatik abiatu baitzen langileen aldeko zorigaiztoko manifestazio hura. Bertan udalean ordezkaritza duten talde guztietako ordezkariak izan dira, eta zenbait herritar ere gerturatu dira. Lore eskaintza egin dute aurki haien oroimena jasoko duen plakaren azpian.
Ordukoa gogoraraziz hasi dute gaurko omenaldia. Euren lan baldintzak hobetzeko martxa egin zuten orduan zientoka lagunek. Mobilizazio baketsua egin zutela gogorarazi du gaurkoan Teo Alberro alkateak. 2.000 langile inguru abiatu ziren Pasaiatik, “gure seme-alabentzako ogia eta lankideentzako askatasuna” eskatuz. Zaldi gainean zihoan polizia manifestarien kontra bortizki oldartu eta portuko hainbat marinel eta arrantzale hil zituen tiroz Donostiako Ategorrietako erlojuaren parean.
Gertatutakoa “oroitu” eta “biktimei aitortza egiteko” adierazpen instituzionala egin dute alderdi guztiek (hemen irakur daiteke osorik). Bide batez, honako lau konpromiso hartu ditu udal gobernuak:
- Ategorrietan eraildako 7 manifestari pasaitarrak, haien familiak eta 1931ko maiatzaren 27ko manifestazioan zauritutako guztiak oroitu eta omentzen ditu.
- Botere publikoek, egiaren, justiziaren eta erreparazioaren printzipioei jarraikiz, Memoria Demokratikoari buruzko urriaren 19ko 20/2022 Legearen eta Euskadiko Memoria Historiko eta Demokratikoari buruzko irailaren 28ko 9/2023 Legearen babesean, memoria historiko objektibo bat defendatu eta balioetsi behar dugu; eta eskubideen eta askatasunen defentsan borrokatu ziren eta hori egiteagatik ondorio pertsonalak jasan zituzten pertsona guztien aintzatespena sozialki partekatu behar dugu; gizarte berdinago eta bidezkoago bat defendatzeagatik kaltetu zirelako.
- Pasaiako Udalak konpromisoa hartzen du, gertakari horien inguruko txostena osorik argitaratzeko euskaraz, galegoz eta gazteleraz. Hala badagokio, Pasaiako Sorginarri bildumaren ‘1931-1939 Zanpatuen Oroimena‘ liburuan jasotako informazioa osatzearren
- 1931ko maiatzaren 27an izandako gertakarietan hildakoen oroimena ohoratzeko eta gogoratzeko asmoa adierazten du, egun hori dela-eta egiten diren ekimen instituzionaletan parte hartuz eta egiten diren ekimen sozialetara (martxak, lore eskaintzak…) herritar guztiak gonbidatuz, gertaera horiek ezagunak izan daitezen eta ahazte kolektiboan eror ez daitezen.
Jarraian gaurko omenaldian HITZAk ateratako zenbait irudi:
