Iparralde Hiribideko obrengatik, trafiko aldaketak
Astearte goizetik ostegun gauera bitarte Landetxeko bidegurutzea itxi egin beharko dute. Gurutzetik Arraguara, errail bakarrarekin.
Landetxeko bidegurutzea itxita egongo da [Argazkia: Google Maps]. Aldundia GI-2134 errepidean obrak egiten hasi zen hilabete hasieran, Arraguatik Elizalderako tartea zaharberritzeko. Elizaldeko zatia txukunduko dute aste honetan, udalak jakinarazi duenez.
Tarterik zailena da, lanketa sakona behar baita. Gainera, bidegurutze ugari daude. Horregatik, trafikoan eragina izango du.
Astearte goizetik ostegun gauera bitarte Landetxeko bidegurutzea itxi egin beharko dute, udalak gaineratu duenez, zoladura azpiko kapak konpontzeko. Gurutzetik Arraguarako bidea zabalik egongo da; errail bakarra egongo da irekita eta semaforoekin bideratuko da ibilgailuen martxa.
Hori bai, Iparralde Hiribidea irekita egongo den arren, ezingo da bertatik Rafael Pikabea hiribidera pasa. Hau da, Landetxeko bidegurutzean ezingo da Ugaldetxora jaisteko bidea hartu.
Landetxeko aparkalekura sarrera ere baldintzatuko dute lan hauek, eta Rafael Pikabea Hiribidetik izango da sarrera-irteera bakarra.
Autobusean aldaketak
Garraio publikoan ere eragina izango da. Landetxeko bidegurutzea ixteak eragina izango du Xorrolaren eta Lurraldebusaren ibilbidean. Xorrolaren ohiko jarduna ez da asko aldatuko: Yon Oñatibiatik ezingo denez Arragua aldera joan, Xorrolaren plazako geltokia tokiz aldatuko dute eta Done Eztebe plazan egingo du geldialdia. Hortik, Donibane kaletik joango da Iparralde Hiribidera. Ordutegian ez da aldaketarik izango.
Eragina handiagoa izango da Lurraldebuseko lineetan. Asteartetik ostegunera (biak barne), E02 eta E04 autobusak Arraguatik Elizaldera joango dira zuzenean (larunbat gauetako E72 zerbitzuak egiten duen moduan). Mendinen eta Yon Oñatibia etorbideko 13 zenbakian ere geldituko da Lurraldebusa.
Rafael Pikabea kaleko geltokietan (Matteo, Isasti, Pikabene eta Pikabea 25) ez da geldituko eta kale honetako erabiltzaileek geltoki hauek erabili beharko dituzte: Ugaldetxo (Intxixu parekoa), Iparralde Etorbidea (biblioteka ondokoa), Mendin edo Yon Oñatibia 13. Talaiako geralekua ere ezabatuko da eta Mamut, Ariztegi edo Matteo geltokietara doazen bidaiariak autobusa Donostiarantz itzultzen denean jaitsi ahal izango dira.
Iparralde etorbidean, ezin aparkatu
Lanek eragin gehiago izango dute. Obra lanak egiteko, Iparralde Hiribideko aparkalekuak kendu dituzte astelehen goizetik aurrera, bide osoaren zoladura berrituko baitute. Ezin da kale horretan aparkatu.
