Oiartzun, Gipuzkoako txapeldun areto futbolean
Lauburu Ibarra gainditu dute, eta Euskal Ligara igotzea lortu dute. Gizonen futbol taldeak garaipenarekin agur esan dio belar naturalari.
Oiartzun KEk Gipuzkoako kopa lortu zuen larunbatean. Liga erregularra irabazi zuten, eta asteburuan finala irabazi dute. Oiartzun Kirol Elkarteko areto futboleko taldea Gipuzkoako Lehen Mailako txapelduna da.
Oñatin jokatu zuten larunbatean, Zubikoa kiroldegian, eta partida bikain hasi zen oiartzuarrentzat: hiru gol lortu zituzten lehen hamar minutuetan. Ibartarren erreakzioa etorri zen ondoren, eta bi gol sartu zituzten.
Atsedenaldira markagailu estuarekin joan ziren, baina susto txiki bat besterik ez zen izan: beste bi gol sartu zituzten segituan, lasaitasuna eskuratzeko. Ez zen gol gehiago izan, eta txapeldun izan dira.
Txapeldun berriro. Izan ere, iaz ere liga irabazi zuten, baita kopa ere. Iaz ez bezala, aurten mailaz igotzea erabaki dute, eta Oiartzun datorren urtean Euskal Ligan arituko da. Erronka polita izango da.
Agurra, garaipenarekin
Larunbatean egun polita prestatu zuten Oiartzun Kirol Elkartekoek. Izan ere, Karla Lekuona egungo belar naturaleko zelaiko azkeneko partida jokatu zen. Ekitaldiak egin zituzten goiz-goizetik, eta dena ongi joan zen… baita partida ofizialaren emaitza ere.
Ugaldetxon belar naturala zapaldu duen azkeneko hamaikakoa.
Gizonen talde nagusiak garaipen batekin agur esan nahi izan zion, baita Ugaldetxora hurbildu zen zale mordoari ere. Ongi hasi zen bidea urratzen, joko onarekin hasi baitzuten partida. Atsedenaldira iritsi baino lehen sartu zuen gola Seinek, baina aukera asko huts egin zituzten.
Aldageletatik bueltatu eta hamar minutura Loperenak sartu zuen bigarren gola. Bergararrek aldea murriztu zuten, baina ez zuten ezer gehiagorako denborarik izan.
Bestalde, emakumeen hirugarren taldeak denboraldia bukatu zuen. Beti Gazteren bisita jaso zuten, eta 2-6 bukatu zen, lesakarren alde. Emakumezkoen Ohorezko Erregional maila azkeneko postuan bukatu dute oiartzuarrek.
