Itsasoaz gozatzen eta zaintzen jarraitzeko ekintzak, Mater-en eskutik
Bisitak, ontzi irteerak, itsas hondakin bilketa... Ostegunetik igandera bitarte askotariko ekintza eskainiko ditu museo ekoaktiboak.
Mater Ontzi Museo Ekoaktiboak datozen egunetarako zenbait proposamen ditu esku artean. Itsasoaz gozatzeko eta hura zaintzeko askotariko ekintzak izango dira ostegunetik igandera. Ostegunean (hilak 30) arrain lonja bertatik bertara ezagutzeko aukera izango dute hala nahi dutenek (5:50etik 7:20era izango da bisita). 13 euro ordaindu beharko dira horretarako.
Ostiralean (hilak 31), berriz, bi ekintza izango dira. Batetik, 17:00etan hasita, zigarrokin bilketa egingo dute eta ilunabarrean, 21:00etan hain zuzen, itsasoan ilunabarraz gozatzeko aukera izango da. Azken honetarako 30 euro ordaindu beharko dira (12 urtetik beherakoek 15).
Larunbatean (ekainak 1) itsas hondakinak arrantzatzera aterako da Mater ontzia, 10:00etatik 13:00etara bitarte ariko dira horretan. Doakoa izango da partaidetza.
Azkenik, igandean (ekainak 2), zetazeoen begiztatzea egingo dute ontzitik. 150 euro ordaindu beharko dira horretan parte hartzeko eta egun osokoa izango da ia. 8:00etatik 16:00etara luzatuko dute.
Informazio gehiago jaso nahi dutenek 619 81 42 25 telefono zenbakira hots egin dezakete, edo bestela, helbide honetara idatzi.
