Errenteriako eraso matxista salatzeko mozioa aztertuko dute plenoan
Hilaren 29an izango da maiatzeko plenoa. Hamar puntuko gai-zerrenda aztertuko dute, tartean Altzibarko etxebizitzei dagokien bat.
Bihar —asteazkena, hilak 29— egingo dute maiatzeko ohiko plenoa. 18:00etan hasiko da, eta zinegotziek hamar puntu izango dituzte mahai gainean.
Horietako bat mozioa izango da, Errenterian-Oreretan 2021ean ertzain batek egin zuen eraso matxistarena. Orain dela hilabete batzuk arte ez da publiko egin. Oarsoaldeko Mugimendu Feministak aurkeztu du, larunbateko mobilizazioan iragarri zuten bezala, eta EH Bilduren udal taldeak bere egin.
Bestalde, Altzibarko etxebizitza tasatuen zozketa izango da beste gai nagusietako bat. Bertan parte hartzeko onartuen eta baztertuen zerrenda behin-behinean onartuko dute (ala ez).
Gai-zerrenda
- Aurreko batzarrei dagozkien akten onarpena.
- Errenterian gertatutako eraso matxista bati buruzko Oiartzungo Mugimendu Feministaren mozioaren onarpena, EHBildu udal taldeak bereganatutakoa.
- Altzibarko ALT-6 eremuko erregimen bereziko 12 etxebizitza tasatuen esleipenerako zozketan parte hartzeko onartuen eta baztertuen zerrendaren behin behingo onarpena.
- Arditurriko plano inklinatuko harmailak, eskulekua eta argiteria jartzeko (2. Fasea) obra onura publikokoa izendatzea eta OTASA, S.A.ri emandako obra baimenari dagokion zergan hobaria aplikatzea.
- 2025 urteko Oiartzungo udalerriko jai eguna izendatzea.
- Beste ekitaldietako ordainagiriak baliogabetzea.
- Gaiaren urgentzia onartu ondoren, hala badagokio, Herri Bideen Inbentarioko 195-196 Andrearriaga Bidean egindako usurpazioa aldentzeko jabari publiko ondasuna berreskuratzeko espedientea hastea.
- Udal herri bide bat mugarritzeko erabakiari jarritako helegitearen amaieraren berri ematea.
- Beste organoen jardueraren jarraipena.
- Eskari-galderak.
