Ekainak festak, antzerkia eta bestelako ekitaldiak ekarriko ditu
HemenGuk azokarekin hasiko dira ekaineko ekitaldiak. Herriko antzerkilariak, Ergoien eta Altzibarko festak eta abar luze-luze bat izango dira
Landetxen ekitaldiak egingo dituzte hilabete honetan. Larunbatarekin batera iritsiko da ekaina, eta —azken aldietan bezala— Oiartzungo Udalak hilabetean egingo diren ekitaldien berri eman du. Askotariko ekitaldiak egingo dituzte, HemenGuk azokarekin hasita.
Herriko helduen eta gazteen antzerki taldeek bere emanaldiak izango dituzte, ekaina iristen den bakoitzean bezala. Ez ohiko ekitaldiak izango dira honakoak: Intxixu Trail, Metraiak film laburren emanaldia edo jardunaldi antifaxistak, baita kabareta ere. Biyurrieneak olinpiaden azkeneko saioa izango du ekainaren 8an, Eskertza Egunarekin batuta.
Kantagiltza zikloa bueltatuko da, iaz jaiotako oiartzuarrei ongietorria egingo diete, klasiko bihurtu den atsolorrarekin.
Bestalde, ekaineko auzoko festek ez dute hutsik egingo: Altzibarren sanpedroak ospatuko dituzte, eta Ergoienen, sanantoniyuak.
Egitarau osoa ikusteko, egin klik esteka honetan.
