Udaleku irekietarako plazen kopurua handitzea erabaki du udalak
Inoiz baino eskaera gehiago jaso ditu udalak aurten, eta eskainitako 320 plazekin ez dela nahikoa ondorioztatu dute. Hortaz, esleipenik gabe geratu diren haurrak ere barne hartuko dituzte.
Pasaiako Udalak aurteno udaleku irekietarako plazen kopurua handitzea erabaki berri du, inoiz baino eskaera gehiago jaso baititu erakundeak. Joan den hilaren 20an, eskaera guztiak jaso ondoren, egin zuen udalak zozketa, eta eskainitako 320 plazekin ez dela nahikoa izango ondorioztatu dute. Hortaz, “esleipenik gabe gelditu ziren haurren kopurua handia zenez”, plazarik eskuratu ez zuten haur guztiak barne hartzea erabaki berri du udalak.
Julen Rodriguez Haur, Nerabe eta Gazteen Sustapen Saileko zinegotziak erabakiaren gaineko xehetasunak eman ditu: “Eskaini dugun plaza kopurua ez da aldatu azken urteotan; betiko eskema berbera mantendu da. Aurten, ordea, udalak inoiz baino eskaera gehiago jaso ditu eta horrek pozten gaitu, eskaintza ona dela esan nahi baitu. Nolanahi ere, zozketan plazarik gabe geratu ziren haurren kopurua alatua izan zenez, eta Pasaiako familien beharrak kontuan hartuta, eskatzaile guztiak eskaintzan sartzea erabaki dugu”, azaldu du.
Plaza kopurua handitzeko erabakia “herriko familien zaintza eta kontziliazio beharrei erantzuteko erabaki baten emaitza” izan dela gaineratu du zinegotziak.
Datorren urteko udalekuei begira “gogoeta bat” hasiko dutela jakinarazi du Rodriguezek, “Pasaiako familien beharrei ahalik eta modu egokienean erantzun ahal izateko”.
