Udal gobernuaren "lidergo falta" salatu du PSE-EEk
EH Bilduk eta Podemos-Aliantza Berdeak osatutako udal gobernuaren lehen urtearen gaineko balorazioa egin du taldeak. "Errektifikatzeko garaiz" daudela diote.
Crespo, Suarez eta Babaze, gaurko agerraldian. Pasaiako PSE-EE udal taldeak agerraldia egin du gaur Donibaneko Kultur Gunean, EH Bilduk eta Podemos taldeek osatutako udal gobernuaren lehen urtearen gaineko balorazioa egiteko. Kezkati agertu dira, eta udal gobernuaren “lidergo falta” salatu dute, besteak beste. Lore Suarez bozeramaileak adierazi du lehen urte honen ikerketa bat egin dutela, eta “kezka handia” dutela adierazi dute. Harekin Miguel Angel Crespo eta Jokin Babaze izan dira.
“Kezkati gaude aurreko legealdian hasitako proiektu batzuk oso motel garatzen ari direlako, eta kasu batzuetan paralizatuta daudela esan dezakegu. Martxan zeuden proiektu batzuetan konpromisoak ez betetzeko arriskua dago, eta ondorio,z finantziazioa gal dezakete. honek pasaitarrentzat galera handia ekarriko luke”, esan du Suarezek. Proiektu hauek pasaitarren bizi kalitatea hobetzeko “giltzarri” direla erantsi du.
“Politika, lidergo, inpultso eta eguneroko kudeaketa falta” leporatu dio bozeramaileak Teo Alberrok gidatzen duen udal gobernuari. Luzuriagako bulegoen, Andonaegiko urbanizazioaren eta aparkalekuaren edota Donibaneko saneamenduaren proiektuak “moteldu” dituztela leporatu diete, eta hauetan kudeaketa falta salatu dute.
Gobernua osatu zenetik urtebetera, Pasaiak “ez duela udal gobernuak zein eredu duen ezagutzen” salatu dute. “Ez dago ez planik, ez eredurik. Eta larriena da honek ekarri duela Pasaia hainbat erakunderen interesetatik eta kezketatik desagerrarazi izana”.
Arduratzeko “arrazoi asko” daudela erantsi du PSE-EEko bozeramaileak, baina oraindik “errektifikatzeko” garaiz daudela esan dute: “ez dugu katastrofista izan nahi. Horregatik Podemos eta EH Bilduri “serio lanean hasteko” eskatu diote.
