Aparkaleku araudia diseinatzeko pasaitarren proposamenak jasoko dituzte
Barruti bakoitzeko egoera, behar eta aukerak aztertzeko saio irekiak egingo dituzte datozen egunetan. Ekarpenak egitera deitu du Teo Alberro alkateak.
San Pedroko portu inguruko aparkalekuaren artxiboko irudi bat. Datozen egunetan Pasaiako Udalak herriko aparkalekua arautzeko landu duen ordenantza proposamenaren lehen zirriborroa aurkeztuko die pasaitarrei. Barrutika egingo dituzte aurkezpenak, eta ekarpenak egitera hurbiltzeko deia egin die Teo Alberro alkateak.
Alkateak nabarmendu duenez, testuaren helburua, “argia” da: “Udalerrian dauden aparkaleku eremuak arautzea, horien erabilera optimizatzeko, betiere Pasaiako egoiliarrentzako aparkalekuak lehenetsiz”.
Mikel Garcia Peñil Mugikortasun zinegotziak esan duenez, batzarretan herrirako diseinatu duten proposamen orokorra aurkeztuko dute, eta barruti bakoitzeko egoera, behar eta aukerak aztertuko dituzte bertako bizilagunekin. Zinegotziak nabarmendu du “oinarrizko testua” dela aurkeztuko dutena, eta lehen bilkura hauek “abiapuntu gisa” irudikatu dituela udal gobernuak, “araudia martxan jarri bitarteko bidea herritarrekin batera jorratzeko”.
Aparkalekuarena “erpin askoko gaia” dela nabarmendu du udal gobernuak eta “nahiko genukeena baino mantsoago aurrera egiten ari bada ere, badugu egoera hobetzeko proposamen bat, eta herritarrekin partekatu nahi dugu hori”, esan du Alberrok. “Badira legeak behartuta hartu beharreko neurri batzuk, baina erabakitzeko aukera zabalik uzten duten xehetasunak pasaitarrekin batera kontrastatzea funtsezkoa da gure egunerokoan halako inpaktua izango duen araudi baterako”, erantsi du Garciak.
Alkateak esan du jakitun direla “aparkatzeko aukerak gure egunerokoan baldintzatzaile zaizkigula pasaitarroi eta kezka handia dagoela” eta horregatik ahalik eta bizilagun gehien bildu nahi dituzte batzar hauetan.
Honakoak izango dira batzarrak:
- Hilak 26, asteazkena: San Pedroko Erti udal aretoan, 19:00etan.
- Hilak 27, osteguna: Trintxerpeko Alkateordetzan, 19:00etan.
- Uztailak 1, astelehena: Antxoko Kultur Etxean, 19:00etan.
- Uztailak 3, asteazkena: Donibaneko Kulturguneko Gela balioanitzean, 19:00etan.
