Musika Bandak kontzertua emango du igandean, Koldo Mitxelenan
Koldo Mitxelena Ikastetxean izango da kontzertua, 12:30ean, eta Alain Ayerdi Gurpegi ariko da zuzendari lanetan.
Errenteriako Musika Bandak udako kontzertuen zikloari emango dio hasiera igande honetan, ekainak 23, Koldo Mitxelena Ikastetxean. 12:30ean izango da ekitaldia, eta Alain Ayerdi Gurpegi ariko da zuzendari lanetan.
Musika Bandak esan duenez, zikloak proposamen eszeniko berritzaileak, artista gonbidatuak eta San Inazioren kontzertu “berezi” bat bilduko ditu, eta Musika Banda Herriko Plazako espazio eszeniko naturalera eramango du berriro, “akustika bikaina eskaintzen baitu eta errenteriar publiko guztiak maite baititu”.
Zikloaren inaugurazio kontzertu honetan, Julian eta Felix Lavillaren, Gustav Holsten edo Björn Ulvaeus eta Benny Andersson konpositoreen lanak plazaratuko dituzte. Ayerdi: “Julian eta Felix Lavillaren ‘Los siete del Txoko’ bezalako lanak gure konpositoreen lanak berreskuratzeko eta estreinatzeko lanaren parte dira. Gure sortzaileen lan eta ekoizpen musikala, dibulgatzea eta sozializatzea helburu duen proiektua”.
