Bidegorri sarea industriaguneetaraino luzatzen hasi dira
Ugaldetxoko poligonora iristen den adarra ireki berri dute. Lanera bizikletan joatea sustatu nahi du udalak, eta adar gehiago eraikiko ditu.
Joana Mendiburu alkatea eta Agustin Lekuona Hirigintza zinegotzia, bidegorri zati berrian. Ugaldetxo industriagunera doan bidegorriaren adar bat ireki berri dute. Oiartzungo Udalak lanera bizikletan joateko aukera bermatu nahi du, mugikortasun jasangarriaren sustatzeko. Ugaldetxoko industriagunera joaten da bidegorri zati hori.
Arditurriko bidegorria eta Errenteria-Oreretakoak bat egiten duten zubitik hasi eta Arbide erreka jarraituaz, Ugaldetxo industrialdea zeharkatzen du bide berriak, Mamut merkatalgunearen atzetik. 700 metro luze ditu eta 752.000 euroko aurrekontua izan du proiektuak.
Industriaguneetara irismena
Udalak gogorarazi duenez, Oiartzunek industriagune asko ditu, eta horiek mugikortasun sortzaile dira. “Toki egokian daude kokatuak: azpi bailara txikietan, lur nahiko lauetan, herrigunetik eta topo geltokitik gertu samar. Azpiegitura egokiak bermatuz gero, bizikleta mugikortasun modu oso aproposa izan daiteke poligonoetara joateko.”, adierazi dute.
Horregatik, herriko zortzi auzoak bidegorriarekin lotu ondoren, industriaguneetaraino iritsi nahi dute. Etorkizunerako asmoak iragarri dituzte. Besteak beste, Iurrita eta Mamut artean egin behar den desbideraketa saihesteko bidea hobetzea aurreikusi du udalak, Oiartzun ibaiaren ibaiertzetik. Euskotrenen geltokitik Lanbarreneraino joateko bidegorria gauzatzeko proiektua ere landu nahi du.
