Sanpedroengatik, trafiko aldaketak
Gaurtik igandera bitarte ezingo da Arraunlari kalera, kaira, Torreatzera eta Ondartxo pasealekura ibilgailuekin sartu. Alternatiba gisa, Hospitalilloko kaian aparkaleku bat egokituko dute.
Bihar (hilak 27) botako dute sanpedroei hasiera emango dien suziria. Igandera bitarte festa izango da nagusi barrutian, eta ordurako antolatu dituzten ekitaldi eta ekintzek trafikoan eragina izango dute. Pasaiako Udalak jakinarazi du gaurtik ezingo dela Arraunlari kalera, San Pedroko kaira, Torreatzera eta Ondartxo pasealekura ibilgailuekin sartu. Bertakoek eta zamalanak egiteko ibilgailuek bakarrik izango dute horretarako aukera.
Arraunlari kaleari dagokionez, 17:00etatik aurrera itxiko dute gaur; bihar ere 17:00etatik aurrera; eta ostiralean, larunbatean eta igandean egun osoan zehar itxiko dute, 10:00etatik aurrera. Balizatatuko eremuetan ezingo da aparkatu biharko 8:00etatik asteleheneko (uztailak 1) 9:00ak arte.
Aparkatzeko alternatiba gisa, udalak Hospitalilloko kaiaren bukaerako eremua egokituko du (San Pedroko lonjatik gertuen dagoen eremua), ostiraleko 16:00etatik igandeko 18:00etara. Sarrera Esnabidetik izango da. Igandeko kayak estropada dela eta, txapelketarako balizatuta dagoen eremua errespetatu beharko da.
Murriztuko dituzten eremuetako bizilagunei, euren ibilgailuak erabili behar badituzte, eremu horietatik kanpo eta egokitutako aparkalekuak erabiltzeko eskatu diete. Gainera, Trintxerpeko bertakoen aparkalekuetan ere aparkatzeko aukera izango dute sanpedrotarrak data horietan.
Pasaiako Udaltzaingoak eskerrak eman dizkie sanpedrotarrei “hartu diren neurriak ulertzeagatik eta horiek betetzen laguntzeagatik, izan ere, neurri horien helburua da jai eremua handitzea eta gidarien eta oinezkoen segurtasuna zaintzea”.
Udalak ezarri dituen ordutegiak gutxi gorabeherakoak dira, eta hortaz, udaltzainek aldatu ditzaketela. Informazio gehiago jaso nahi dutenek 943 00 43 00 telefono zenbakira hots egin dezakete.
