Gizon bat atxilotu dute beste bat labanaz zauritzeagatik
Zauritua Donostia ospitalera eman dute, eta erasotzailea atxilotu du Ertzaintzak.
Gizon bat atxilotu du Ertzaintzak, beste bat labanaz zauritzeagatik. Atzo arratsaldean izan ziren gertakariak, 17:00ak inguruan Iztieta auzoko Donostia kalean. Bi pertsona borrokan ari zirela jakinda patruilak bertaratu ziren aipatu kalera. Aldakan zauri bat zuen eta odoletan ari zen gizon bat aurkitu zuten bertan, eta Segurtasun Sailak esandakoaren arabera, osasun zerbitzuen laguntza eskatu zuten berehala zauritua artatzeko. Donostia ospitalera eraman zuten hura anbulantzian, eta bertan ospitaleratuta gelditu zela azaldu dute.
Segurtasun Sailaren informazioaren arabera, ezagun batekin liskarra izan zuen zaurituak, oraindik ere argitu ez diren arrazoiengatik, eta hark arma zuri batekin zauritu zuen.
Ertzainek gertakarien leku inguruan aurkitu zuten ustezko erasotzailea, eta atxilotu egin zuten. Lesioak eragiteko ustez erabili zuen labana ere kendu zioten. Atxilotuak polizia aurrekariak ditu, eta gaur egunean zehar eramango dute epailearen aurrera.
