Aparkalekuen araudiari ekarpenak egiteko epea, zabalik
Barrutikako saioak bukatutzat eman ditu udalak, eta orain, ekarpenak jasotzen hasiko da. Lau bilerak "irekiak eta aberasgarriak" izan direla dio.
Pasaiako Udalak bukatutzat eman du Aparkalekuen Ordenantzaren lehen proposamenaren zirriborroa aurkezteko bilera erronda. Azken asteetan lau barrutietan bilera bana egin dute herritarrekin, orotara, 200dik gora lagunek parte hartu dute. Orain, araudi horri ekarpenak egiteko epea zabaldu dutela jakinarazi du udalak.
Saio hauetan araudiaren ildo orokorrak eta barruti bakoitzerako proposamen eta xehetasunak azaldu dizkiete pasaitarrei. Alkateordeek “oso positiboki” baloratu dituzte saioak, “irekiak eta aberasgarriak” izan baitira haien ustez: “Bertaratu den jende kopuru handiaz gain, hurbildu direnen parte hartze maila handia izan da, ekarpen asko jaso ditugu araudian txertatzeko”, Mikel Garcia Peñil zinegotziak.
Bilkura guztiak bukatuta, ekarpenak egiteko bidea zabaldu du udalak, hilaren 15era bitarte (astelehena da) bidal daitezke horiek.
Araudiaren irizpide nagusia “bertakoen aparkatzeko beharrak lehenestea” dela erantsi du Garciak, eta horren arabera “proposamen espezifikoak” egin dituztela barruti bakoitzerako. Udal gobernuak aurkeztutako zirriborroan lau aparkaleku mota ezarri dira: bertakoentzako eremuak, mistoak, salbuespenezkoa oinezkoentzako guneetan eta denbora mugatuko aparkalekuak.
Barruti bakoitzeko bizilagunei zonifikazio proposamenak egin dizkiete bilera hauetan, “aparkaleku mota bakoitza barruti bakoitzeko zein eremutan ezar litekeen hausnartzeko” asmoz. Proposamena guztiz irekiak direla zehaztu du Mugikortasun zinegotziak: “Hausnarketari eta ekarpen berriei ekiteko zirriborroak dira egin ditugunak. Asmoa da horien bidez proposamen eta ideia berriei atea zabaltzea, eta gure konpromisoa da horiek aztertu eta erantzun bat ematea”.
Bilera horietan eztabaidatu dituzten gaiak zein proposamenak lotura honetan kontsulta daitezke. Esteka horretan ere barruti bakoitzerako ekarpenak egiteko loturetara jo daiteke.
