San Pantaleon eguna antolatzen hasi dira
Donibaneko Jai Batzordeak jakinarazi du sardina postua jarri nahi duten kuadrillek izena emateko aukera dutela jada, hilaren 12ra bitarte.
Iazko San Pantaleon Eguneko irudi bat. Datorren hilaren 27an (larunbata da), urtero lez, Donibaneko ia txoko guztietan sardina usaina izango da nagusi. Santio Jaien barruan, San Pantaleon eguna ospatuko dute orduan sanjuandarrek, sardinaren festa handia. Ordukoa prestatzeko lanean hasi dira jada. Hala, sardina postua jarri nahi duten kuadrillei izena emateko deialdia luzatu die udalak. Inprimaki bat bete beharko dute eta udalaren erregistroan edo lotura honen bitartez aurkeztu beharko dute.
Hurrengo ostirala, hau da, hilaren 12a, izango da apuntatzeko azken eguna. Postua jartzeko eskaeran honako datuak eman behar dira: eskatzailea nor den, postuaren kokaleku zehatza, zer material behar duten, zenbat sardina kutxa nahi dituzten eta zenbat ikatz zaku behar dituzten.
Izena emateko epea behin bukatuta, zozketa egingo dute kuadrillen artean, eta horrela aukeratuko da nork banatuko dituen sardinak herritarren artean. Bi kuadrilla aukeratuko dira eta kuadrillek arduradun bana izendatuko dute.
Ezarritako epean izena eman ez duten kuadrillak ez dira banaketa zerrendan sartuko, eta beraz, ez dute sardinarik jasoko.
