Uda honetan kalera aterako dute zinema Antxon eta Donibanen
Joan den urtean Zinema Kalean egitasmoak Antxon izan zuen arrakasta ikusirik, berriro antolatzea erabaki dute herriko gazteek. Lau saio izango dira datozen aste eta hiletan.
Pasaiako Udalak dena prest du aurtengo Zinema Kalean egitasmorako. Datorren hilaren 18an (osteguna da) emango diote hasiera, eta irailaren 19ra bitarte luzatuko dute egitaraua. Bokalek herriko gazte taldeekin duen elkargunetik jaio da egitasmoa, eta iazko arrakasta ikusirik berriro antolatzea erabaki dute gazteek. Hala, Antxoko Papineko Gazteriak, Topaguneak eta Pasai Donibaneko erreka gazte taldeek lau zinema saio antolatu dituzte elkarlanean. Antxon eta Donibanen izango dira emanaldiak.
Egitasmo honen helburua, “Pasaiako gazteen artean euskarazko kultur edukien kontsumoa sustatzea” dela azaldu dute udaleko iturriek. Helburu horrekin bat eginez, honako saioak izango dira datozen aste eta hiletan:
- Erlauntza filma proiektatuko dute hilaren 18an (osteguna da), 22:00etan, Antxoko Biteri plazan.
- Karpeta urdina filma proiektatuko dute abuztuaren 9an (ostirala da) Donibaneko Santiago plazan.
- Nora filma proiektatuko dute abuztuaren 22an (osteguna da), 22:00etan, Donibaneko Santiago plazan.
- Bidasoa filma proiektatuko dute irailaren 19an (osteguna da), 22:00etan, Antxoko Biteri plazan.