Festa euskaldunen erreferente eta ikur bilakatu dira
Bederatzi urte dira badiako uretatik jauzia egin zutela Trintxerpeko kale eta plazetara Korkoiburuek. Jaien atarian haiekin bildu da HITZA.
Festak eztanda egingo du gaur arratsaldean Trintxerpen, karmenak hemen dira. Herritarrek aspalditik prest dituzte zapi urdinak eta arrantzale jantziak. 20:00etan botako dute suziria, baina aurretik ere izango da zerekin gozatu. Festa giroa suma daiteke barrutian.
Urteko egun berezienen atarian Trintxerpeko Korkoiburuekin bildu da HITZA. Azken urteetan haien lana ezinbesteko bilakatu da jaiak, inauteriak, Euskararen Eguna eta abar luze bat antolatzeko. Bederatzi urte dira badiako uretatik jauzia egin zutela Trintxerpeko kaleetara Korkoiburuek. Hastapenak gogoratu ditu taldeko Ane Perezek: «Lau lagun bildu ginen poteoan. Ikusten genuen Trintxepren ez zegoela ia ezer gazteei zuzenduta, eta bereziki euskaraz. Hutsune hori betetzeko elkartu ginen», kontatu du. Poteo hartatik, pixkanaka, taldea osatzen joan ziren, eta 2015ean lehen bazkari herrikoia antolatu zuten. «Poteo eta bazkari batetik egitasmo handi bat etorri zen. Jende asko engantxatu zen».
Hasiera batean «gazteak saretzeko» asmoa bazuten ere, hedatzen eta handitzen joan dira Korkoiburuak. Haur, gazte eta heldu. Denetik aurki daiteke taldean, eta haiek antolatzen dituzten ekitaldi eta ekintzetan. «Larunbateko bazkarian 200 bat lagun joango gara, haur, gazte eta heldu».
Bederatzi urte hauetan herriari bira bat eman diotela aitortu du harro Perezek. «Jendeak asko parte hartzen du, beti galdezka ari dira ea zer egingo dugun, eta hori eskertzekoa da. Lehen ez zegoen euskarari lotutako horrelako giroa Trintxerpen. Gurekin badira euskaraz ez dakiten gurasoak, eta euskaraz ez jakin arren, hurbildu direnak eta esfortzu hori egiten ari direnak. Eta hori oso polita da», nabarmendu du.
Taldekoak urte hauetan lortutakoarekin pozik eta harro direla dio Perezek: «Gogoz egiten dugun lana da, merezi duena».
Trintxerperen ikur
Azken urteetako ia ospakizun eta aldarrikapen guztietan bezala, karmenetako hasieran ere Korkoiburuak presente izango dira, ordezkari paregabearekin. Korkoiburu buruhandia bertan izango da, haurren eta ez hain haurren gozamenerako. «Hasieran haurrek ez zuten ezagutzen, baina orain asko maite dute. Ikur bat bilakatzen ari da. Zerbait egin dugu, badakite hor gaudela», dio, hunkituta.
