Marinelen danborradarekin, agur aurtengo Karmengo Jaiei
Karmengo Amaren eguna da gaur, eta hitzordu garrantzitsua izan dute trintxerpekoek: Marinelen danborrada. Jaietako azkena izan da gaurkoa.
Ordu gutxi batzuk baino ez dira geratzen aurtengo Trintxerpeko Karmengo jaiak amaitzeko, baina, halere, badute trintxerpetarrek festarako gogoa oraindik ere. Izan ere, Marinelen danborrada da gaurko Karmengo Amaren eguneko hitzordu nagusietako bat. 17:00etan ekin diote ibilbideari, elizan, eta bertan amaitu dute ibilbidea barrutia danbor hotsekin alaitu ostean.
Eguraldiak ere lagundu du aurtengo jaiei agur esaten, penaz baziren ere herritar asko, eguzki izpiek goxatu egiten baitzuten azken danborrada.
Elizatik abiatu eta kaia zeharkatu dute danborradakoek, eta lurretik uretara egin dute parte hartzaileek, pantalanean ontziratu eta itsas bidea egin baitute San Pedroko Torreraino. Behin itzulia eginda, Euskadi etorbidea, Jaizkibel kalea, Ulia etorbidea, Andonaegi kalea, Arrandegi kalea eta Serafin Esnaola kalea alaitu dituzte aurtengo azken danborradarekin; baina, ez da bertan amaitu bidea, Gudari plazatik Euskadi etorbidea zeharkatu baitute berriz, eta elizan eman baitiote amaiera ibilaldiari.
Sei danborradez gozatzeko aukera izan da jaietan, eta, beste horrenbeste ikusteko luze itxaron beharko dute bizilagunek. Tira, urtebete ez da horrenbeste. Jarraian, marinelen danborradako hainbat irudi.
Oraindik, ordea, badago zer egin gaurko egunean zehar:
18:00 Bakailao tortillen lehiaketa Gudari plazan.
18:00 Erraldoiak eta buruhandiak Illumbeko txistulariekin.
18:30 Adinkideren errezitaldia Serafin Esnaola plazan.
19:00 Haur pertsonaien ikuskizuna Gudari plazan.
22:00 Zezensuzkoa Gernika plazan.
