Andonaegiko futbol zelaiko belarra berrituko du udalak
Uztailaren 22an hasiko dira lanekin, eta lau asteren buruan aurreikusten dute amaitzea. Futbol 7 eta 11ko marrak margotuko dituzte zelaian.
Hondatuta dagoela eta, Andonaegiko futbol zelaiko belarra berrituko dute. Uztailaren 22an hasiko dira lanekin, eta 290.103,86 euroko inbertsio egingo dute.
Iraitz Pazos Zerbitzu, Sare eta Mantenu lanetako zinegotziak adierazi du eraberritzea euren jarduera zelaian garatzen duten kirol kluben eskaerei emandako erantzun bat dela. Bestalde, Julen Rodriguez Kirol zinegotziak gehitu du 2014an kirol eremu horretako belarra berritu zenean, geruza berria zaharraren gainean ezarri zela: “Horrek zenbait kirolariren lesioak eragin ditu, belarrean zimur edo tolesturak sortu baitira denboraren poderioz”.
Horretaz gain, udaletik azpimarratu dute Espainiako Futbol Federazioak 2.B mailara arteko lehiaketetarako ezarritako baldintzak betetzen dituen belarra jarriko dutela. Beraz, futbol zazpirako eta futbol hamaikarako markak egingo dira “lurzorua hobeto aprobetxatzeko”.
Lanak lau asteren buruan amaitzea aurreikusten duten, eta belar berriaren egoera aztertuko dute hurrengo hilabete eta urteetan modu egokian dagoela baieztatzeko.
