Irribarretsu eman diote hasiera donibandarrek Santa Ana egunari
Arrakastatsuak izan dira gaurko pintxo dastaketa zein kuadrillen topaketa. Arratsaldean, goitibeherak izango dira nagusi Donibanen.
Goiztiar hasi dute aurtengo Santa Ana eguna donibandarrek; izan ere, goizeko bederatzi eta erdietan jaso dituzte ezinduak beren etxeetan, eta handik gaurko egunari izena ematen dion ermitara igo dituzte. Ohikoa den moduan, jende ugari bildu da bertan, baina are jende gehiago inguratu da antolatzaileek ermita atarian prestatu dituzten mahaietara. ‘Salda eta pintxo dastaketa txistulariekin’ zen meza ondorengo ekintza; aldiz, ‘pintxo dastaketa txistulariekin’ izan da bakarrik gaurkoan. Salda ere prestatua zuten gaurko egunerako, baina, antza, salda ez zegoen egoera onean, eta ezin izan dute hura dastatu. Bazuten, ordea, nahi beste ardo. Txistuen eta danbor hotsen artean dantzan aritu dira dozenaka herritar, eta, askok, gainera, elizako ateari erreparatu diote maiz, duela ez asko, ate berria jarri baitute.
Eskaileretatik behera abiatu dira batzuk gero, eta autoetan sartu dira beste batzuk, baina helmuga bera zuten denek: Santiago plaza. Hain zuzen, kuadrilla bazkaria da gaurko eguneko beste protagonista nagusietako bat, eta herritarrak plazan bildu dira kuadrillen mozorroak ikusi eta bide batez, bazkari autogestionaturako norbere gauzak prestatzeko.
Jarraian, gaur goizeko argazki batzuk. Beherago, gaurko eta biharko egitaraua.
Donibaneko Santio Festak. Gaurko eta biharko egitaraua.
GAUR (OSTIRALA). SANTA ANA EGUNA.
- 17:00. Goitibeherak.
- 20:00. Mirari Martiarenaren bakarrizketa txosnetan.
- 22:00. Erromeria Santiago plazan, Gauargi taldearekin.
- 00:00. Kontzertua txosnetan.
BIHAR (LARUNBATA). SAN PANTALEON EGUNA.
- 10:00. Kukaina Santiago plazan.
- 12:00. Jubilatuen eta arrantzaleen omenezko meza Bonantzan.
- 14:00. Jubilatuen bazkaria Santiago plazan.
- 15:00. Herriko kuadrillek sardinak eta ikatza jasoko dituzte Arizabalon.
- 16:15. Pasai txaranga herrian barrena.
- 19:00. Sardina jana herri osoan.
- 20:00. DJ Javi Santiago plazan.
- 22:30. Arrantzaleen danborrada Konstantzia banderekin.
- Ondoren, DJ Javi.
- 00:00. DJ Bull txosnetan.
