Jose Antonio Aduriz ohorezko euskaltzain oiartzuarra zendu da
Uztailaren 30ean hil zen ohorezko euskaltzain oiartzuarra. Bere ibilbide profesionala UZEIn egin zuen nagusiki, baina nabarmentzekoak dira Euskaltzaindiaren Hiztegiari eta Hiztegi Batuari egindako ekarpenak.
Pasa den uztailaren 30ean, Jose Antonio Aduriz ohorezko euskaltzain, hizkuntzalari, frantziskotar eta Jakin taldeko kidea zendu zen. 1991ko urtarrilaren 31n euskaltzain urgazle izendatu zuten, eta gero, 2018an izendatu ohorezko euskaltzain.
Bere ibilbidearen urte gehienak UZEIn eman zituen. “Berea lan isila izan da; isila, baina funtsezkoa. Langile fina bezain apala izan da Jose Antonio, aitortzarik bilatu ez zuena eta nabarmentzeari etengabe muzin egin ziona” adierazi du UZEIk.
Aduriz, 1949an jaio zen Oiartzunen eta Deustuko Unibertsitatean egin zituen Euskal Filologiako ikasketak. Euskaltzaindiaren Hiztegi Batuaren eta gero Euskaltzaindiaren Hiztegiaren zutabe nagusietako bat izan zen. UZEIren arabera, bereak dira, bereziki, hiztegia osatzeko erabiliko ziren irizpideak finkatu eta osatzeko “lan neketsua”, baita ere lan hori aurrera eramateko behar izan zen “pazientzia”. Gainera, Euskaltzaindiaren Hiztegia aurrera eramateko ardura izan zuen ere.
Batzorde askotan ibilitakoa zen Aduriz, besteak beste, Euskararen Bilketa Sistematikoaren batzordean, eta arestian aipatutako Hiztegi Batuko lantaldean eta Euskaltzaindiaren Hiztegiko lantaldean. Andres Urrutia euskaltzainburuaren esanetan, “asko” zor dio Euskaltzaindiak oiartzuarrari, eta Euskaltzaindiaren hiztegiak bereziki. “Langile fina eta asperrezina zen Jose Antonio, euskal lexikografiaren habe gotorra” oroitu du Urrutiak.
