Maitaldia jaialdian Dantzagunea nork ordezkatu bilatzen ari dira
Biarritzen sortutako dantza saio irekien jaialdia da, eta Herriko Plazara iritsiko da irailaren 7an. Dantzagunea ordezkatzeko bi pieza hautatuko dituzte.
Maitaldia jaialdia Errenteria-Oreretara iritsiko da irailaren 7an, eta jardunaldi berezi bat eskainiko dute Herriko Plazan 17:00etatik aurrera. Egun honen antolakuntzan, Malandain Ballet Biarritzekin aritu dira elkarlanean Errenteriako Udala, Herri Arte Eskola, Kukai, Ereintza dantza taldea eta Gipuzkoako Dantzagunea.
Saio laburrak eskainiko dituzte antolatzaile lanetan dabiltzan dantza taldeek, ordu eta erdiko saioak, hain zuzen ere. Arratsaldearekin hasteko, Malandain Ballet Biarritzeko kide batek ballet klasikoko barra saio ireki bat eskainiko du, 17:00etan.
Segidan, Herri Arte Eskola, Kukai, Ereintza eta Dantzagunean txandakako zenbait saio labur eskainiko dituzte. Ordu eta erdi iraungo du saio honek.
Dena den, egitaraua ez dago itxita eta Gipuzkoako Dantzagunea ordezkatzeko bi pieza koreografiko hautatzeko prozesua martxan dago. Deialdi hau gaur (hilak 1) ireki da eta 15era bitartean egongo da zabalik. Proposamenen hautaketa, berriz, hilaren 19tik 23ra egingo dute, eta hautatutako proposamen bakoitzeko 500 euroko diru saria banatuko dute.
Proposamen horiek aurrez sortutako ikuskizun baten zatiak edota piezak izan daitezke. Ez dute zertan lan berria izan behar eta baldin badira ere ez du epaian eragingo. Gaia irekia da, eta edozein dantza edota mugimendu arteen diziplinako proiektuak aurkez daitezke.
Deialdi hau konpainiei, talde egonkorrei, banakako proiektuei eta deialdi honetarako sortutako kolektiboei begirakoa da. Piezaren iraupena, 15 minutukoa behar du izan. Xehetasun guztiak, ondoko loturan eskura daitezke.
