200 txirrindularik hartuko dute parte Xanistebanetako 76. Txirrindularitza Sarian
Hilaren 4an izango da Xanistebanetako urteroko txirrindularien hitzordua, 10:00etan hasita. Ibilbidearen 116 kilometrotan, 11 aldiz zeharkatuko dute herriaren bihotza.
Xanistebanetako 76. Txirrindularitza Sariaren aurkezpena egin du gaur OTXEk Kastroko Iturrian. Txomin Perurenaren omenezkoa izango da, eta bigarren urtez, OTXEk hartu du antolaketa bere gain. Dena den, babesleak izan dituzte gibelean: Oiartzungo Udala, 33 denda, taberna eta enpresa ezberdin, eta egunean bertako boluntarioak.
Hilaren 4an izango da lasterketa, eta 116 kilometroko ibilbidea Doneztebe plazatik hasiko dute izena eman duten 200 txirrindulariek, 10:00etan. Irteerako leku berean bukatuko da, eta orotara 11 alditan pasako da herritik tropela.
Txirrindularitza zaleentzako ohorea izango da igande honetako lasterketa, Euskal Herriko Elite nahiz 23 urtez azpiko txirrindulari onenak ibiliko baitira herrian barna. Horien artean, Gexan Albisu, Beñat Garaiar eta Ekaitz Iñigo de Miguel oiartzuarrak egongo dira. Iazko garailea izan zen Haimar Etxeberria oiartzuarrak huts egingo du oraingoan, profesional mailan ari baita Kern Pharma taldean.
Lasterketak iraun bitartean, pintxo lehiaketa eta sagardo dastaketez gozatzeko aukera eskainiko da Doneztebe plazan ere. Herriko sagardoen lehiaketari 11:50ean ekingo diote, eta pintxo lehiaketari 13:15ean. trafiko eragozpenak ekiditeko, “denboraz abiatzeko” gomendioa eman diote antolatzaileek gidariei.
