Giza Eskubideen Dokumentalaren Jaialdia, abenduaren 9tik 15era
Hirugarren edizioa izango da, eta data aurreratu dute Giza Eskubideen Egunarekin bat egin dezan. Dokumentalak lehiaketara aurkez daitezke jada.
Errenteria Human Rights Documentary Film Festival festival awards ceremony. November 26, 2023. Errenteria-Orereta (Basque Country). (Gari Garaialde / Bostok Photo) Giza Eskubideen Zinema Dokumentalaren Jaialdiak hirugarren edizioa izango du, abenduaren 9tik 15era. Orain artean, azaroko azken egunetan egiten zen jaialdia, baina atzeratzea erabaki dute Giza Eskubideen Egunarekin bat egin dezan jaialdiak.
Hartara, jaialdia Errenteriako Udalak antolatzen duen Giza Eskubideen hamargarren Jardunaldiaren barruan egingo da, eta “integrazioa, lankidetza eta elkarrizketa handiagoa” izango du udaleko Kultur Aniztasuna, Garapenerako Lankidetza eta Giza Eskubideen sailarekin. Jardunaldiak eta jaialdiak batera egiteak, Errenterian zinemaren eta Giza Eskubideen aldeko sentsibilizazio erantsiaren aldeko lankidetza berresten dutela azaldu dute.
Jaialdiaren apustu nagusia dokumental generoarena da, eta gaiei dagokienez hainbat errealitatetara gerturatzea da asmo nagusia, feminismoarenera, LGTBI kolektiboarenera, gatazka armatuenera, migrazioarenera eta ekologismoarenera, hain zuzen ere.
Hirugarren edizioak berrikuntzak dituen arren, jaildiaren asmoei eutsi egin dietela adierazi dute udalak eta Ozzinemak, antolatzaileak. Alde batetik, munduko bidegabekeriak ikusararazten eta salatzen jarraituko dute, lurraldeko nahiz munduko hainbat lekutako dokumentalak proiektatuz, “funtsezkoa baita Errenteria bezalako kolektibo sozial batek berdintasunaren, elkartasunaren eta elkarrekiko errespetuaren arloetan aurrera egin dezan”. Bestetik, istorio konprometituenak irudietan jartzera ausartzen diren pertsonen sormenezko eta laneko tranpolina izaten segituko du.
Parte hartzea
Lehiaketan parte hartuko duten film laburren izen emateak Festhome izeneko plataformaren bidez egin beharko dira. Azken eguna irailaren 4a izango da, eta film laburrek, gehienez, 60 minutuko iraupena izan behar dute.
