"Giro ona eta alaitasuna" nagusitu dira Xanistebanetan
Xanistebanak igarota jaien balorazioa plazaratu du Oiartzungo Udalak. "Giro sanoan" ospatu direla adierazi dute.
Jai giro sanoan ospatu dira 2024ko Oiartzungo Xanistebanak. Hala iragarri berri du Oiartzungo Udalak. Jende ugari hurbildu da Xanistebanetan parte hartzera, eta guztiei esker “giro ona eta alaitasuna” izan dira nagusi.
Jai batzordeak ekintza ugari antolatu zituen egun zein gau guztietarako, eta horietako parte hartzea altua izan dela jakinarazi du udalak. Gainera, antolakuntzan eta koordinazioan egin den “lan ona” goraipatu nahi izan dute. Bestalde, eraso matxistei dagokienez ez dute inolako intzidentziarik jaso, eta beraz, ez dute aurrez adostutako protokolorik martxan jarri behar izan. Alde horretarik, poztasun betea erakutsi dute udal ordezkariek.
Garraio publikoari dagokionez udalak autobusen maiztasuna eta zerbitzuak areagotzeko neurriak hartu zituela jakinarazi dute. Xorrolak gaueko zerbitzua eskaini zuen eta larunbat gauerako ez ohiko Ekialdebus zerbitzu gehigarriak antolatu zituzten. Foru Aldundiari eta enpresari eskerrak eman dizkiote erakutsi zuten prestutasunagatik.
Hondakinei dagokionez, edalontzi erabilgarriei esker zabor kopurua asko murriztu zela adierazi du udalak, eta pozik agertu da txosnetako antolatzaileek kristalezko botilarik ez zerbitzatzeko hartutako erabakiaren aurrean. Erabaki horri esker “hondakin arriskutsu” gutxiago egotea ahalbidetu duela baietsi dute. Komunei dagokienez, aurten zerbitzua hobetzen ahalegindu dira, komun gehiago eta erosoagoak jarriz. Horien erabilera “txukuna” izan dela esan duten arren, datorren urteari begira neurri gehiago hartuko dituztela baieztatu dute, “besteak beste, garbitasunari begira”.
Azkenik, udaletik eskerrak eman dizkiete festetan lanean aritu diren udal langile eta boluntario guztiei.
