Lehen Kontxako Banderatik 100 urte pasatu direla ospatuko dute sanjuandarrek
1924an eskuratu zuten lehen bandera. Mendeurrena behar bezala ospatzeko asmoz, egun osoko egitaraua prestatu du Matxet elkarteak irailaren 14rako.
Datorren irailaren 14a (larunbata da) egun oso berezia izango da sanjuandarrentzat, bereziki arrauna maite eta gozatzen dutenentzat. Izan ere, Matxet kultur elkarteak egun osoko ospakizuna prestatu du ordurako, egun horretan 100 urte beteko baitira barrutiak arraunaren munduan marka handia lortu zuenetik: 1924. urtean Kontxako estropadetako lehen bandera irabazi zuten, Francisco Laboa ‘Matxet’ patroiaren gidaritzapean. 14 gizonek osatu zuten orduko eskifai garailea, eta orduan abiatu zen sanjuandarrek hainbat urtetan itsasoan izan duten ibilbide arrakastatsua.
Garaipen historiko horren mendeurrena behar bezala ospatzeko denetik izango da irailaren 14an. Bizkaia plazak jasoko ditu ekitaldi gehien, baina Juanba Berasategin ere zenbait emanaldi egingo dituztela iragarri dute.
“Duela mende bat jokatu zen estropada historiko hura. 100 urte beteko diren egunean bertan, garaipen hura lortu zutenei omenaldia egingo zaie zenbait ekitaldiren bitartez”, diote elkarteko iturriek. Besteak beste, Matxet Handia 1924-2024 ikuskizuna eskainiko dute. Honetan, lehen bandera hura lortzeko egindako bidea azalduko dute garai historikoan kokatuz eta itsasoa eta arraunari buruzko euskal abestien bertsioekin.
Egitaraua, honakoa da:
- 9:30: 1999ko Kontxako irabazleak traineruarekin arraunean ariko dira badian.
- 11:00: 1924. urtean Kontxako Estropada irabazi zuten senideei harrera egingo diete udaletxean.
- 11:30: Pasaiako Bateleren zortziko dantza eta kalejira izango dira udaletxeko sarreran.
- 12:00: Matxet Handia 1924-2024 ekitaldi musikatua egingo dute (euskaraz) Juanba Berasategi aretoan. 5 euro ordaindu beharko dira.
- 13:30: El Gran Matxet 1924-2024 ekitaldi musikatua (gaztelaniaz) Juanba Berasategi aretoan. 5 euro ordaindu beharko dira.
- 14:30: Bazkari herrikoia egingo dute. Bonuak 20 euroan eskura daitezke.
- 17:00: Danborrada.
- 18:00: Dantzaldia Mikel, Luisma eta Pakoren eskutik Bizkaia plazan.
Sarrerak eta bonuak Matxet txiringitoan, Berezi kafetegian eta Juandanburu harategian daude salgai. Bazkarirako bonuak erosteko azken eguna irailaren 4a izango da.
