AEK-ko lau euskaltegiek matrikulazio kanpaina abiarazi dute
Oarsoaldeko AEK-ko eskolak urriaren 1ean hasiko dira. Xenpelar AEK-k euskaltegi berrian egingo du estreinakoz ikasturte osoa.
Zabaldu dute dagoeneko Oarsoaldeko AEK-k matrikulazio kanpaina Euskara eroso bizitzeko lelopean. Gainera, badute ikasturte honetan “pozik egoteko motiborik”; izan ere, Oreretako Xenpelar AEK-k egoitza berrian hasiko du 2024-25 ikasturtea, zehazki Nafarroa etorbidetik.
Ohi bezala eskolak urriaren 1ean hasiko dira, eta aurreko urteetan bezalaxe eskaintza zabala dute Lezoko Oroitzene AEKn, Oiartzungo Intxixu AEKn, Oreretako Xenpelar AEKn eta Pasaiako Txirrita AEKn. Honatx ikasleek aurtengorako dituzten aukera batzuk: euskalduntze ikastaroak, mailak egiaztatzeko ikastaroak, C2 ikastaroa, autoikaskuntza, merkatarientzako eta gurasoentzako ikastaroak, langabetuentzako ikastaro trinkoak, mintza taldeak, Mintzalaguna egitasmoa, eskualdeko irakasleentzako formakuntza, C1 mailako azterketa prestatzeko eskolak ikastetxeetan…
Horiez guztiez gain, AEK-koek azpimarratu dute HABEren diru laguntza lerro berria dutela, hain justu A0ko ikasleei zuzenduta dagoena, eta horren bidez euskara ikasten hasten diren herritarrek “baldintza hobeak izango dituztela gurera hurbiltzeko”. Halaber, gehitu dute ikasle guztiek dutela diru laguntzak eskuratzeko aukera, betiere asistentzia ona izaten badute.
Bestalde, eskolaz kanpoko ekintzak ere egingo dituzte aurten; hala nola euskaltegietako afariak, AEKren liburu eskaintza edo Errigora egitasmoa. “Herritarrak euskara ikastera, dakitena hobetzera eta euskara erabiltzera gonbidatu nahi ditugu”, diote langileek.
Gainera, pozez kontatu dute AEK-ko langileek pasa den ikasturtean 63 talde artatu zituztela 25 irakasleren artean; tartean, hamasei eta hemezortzi urte bitarteko neska mutilek osatutako hamahiru talde eskualdeko eskoletan. Ikasturte honetan ere izango dute ikasleek aukera hori 24 euroren truke.
