Lartaunen 60 urteak ospatzeko ekitaldi sorta antolatu dute
Udazkenean izango dira abesbatzaren ekitaldi horiek, eta lehena hilaren 21ean izango da: Kantu Bazkaria egingo dute Artason.
Lartaun Abesbatzak 60 urte betetzen ditu aurten, eta ez dute nolanahi ospatuko, ez. Hain justu, udazkenerako ekitaldi desberdinak antolatu dituzte, eta egitaraua zabaltzen lehena Kantu Bazkaria izango da, irailaren 21ean. Artaso elkartean izango da hitzordu hori, 14:00etan, eta txartelak hilaren 9tik aurrera egongo dira salgai Landetxe tabernan, 30€an.
Horretaz gain, antolatzaileek aurreratu dute urriaren 20an eta azaroaren 17an kontzertuak emango dituztela gonbidatu batekin. Bi kontzertuak 12:00etan izango dira, Landetxen. Gainera, gehitu dute abenduaren 14an izango dela urteko azken kontzertua; Landetxen hori ere. 20:00etan izango da emanaldia, eta oraingoz soilik abesbatzakoek abestea aurreikusten badute ere, aldaketak egon litezkeela aurreratu dute.
