Bizi-lagunek larrialdiei aurre egiteko ikastaroak antolatu ditu
Formakuntza saioak irailaren 18an, azaroaren 20an eta urtarrilaren 22an izango dira, 18:00etatik 21:00etara, Landetxe Kultur Aretoan.
Larrialdiei aurre egiteko ardura profesionalek dute arren, udalak dio laguntza iritsi bitartean lekukoek duten jarrerak baldintzatzen duela maiz emergentziaren emaitza. Gauzak horrela, azaldu dute Oiartzundik gertuen dauden anbulantziak Fanderiako oinarrizkoa eta Bidasoako medikalizatua direla, eta nahiz eta azkar mugitzen diren, nekez iristen direla 8-10 minutu baino lehen. Ildo horretatik, beraz, minutu horietan lekukoek egindako ekintzak eta lehen sorospenak berebizikoak azaldu dute.
Bizi-lagun elkartea osasun eta larrialdietan eskarmentu handia duen hogeita lau oiartzuarrek sortu zuten 2018an, eta erronka eta helburu partekatu batekin hasi ziren biltzen: Oiartzun emergentziei aurre egiteko ahaldundutako herria izatea lortzea.
Emergentzien aurrean ahaldundutako oiartzuarren sarea zabaltzen jarraitu nahi dute, eta datozen hilabeteetarako prestakuntza saioak antolatu dituzte irailaren 18an, azaroaren 20an eta urtarrilaren 22an, 18:00etatik 21:00etara, Landetxe Kultur Aretoan. 60 lagunentzat egongo da lekua ikastaro hauetan, eta izena webgunean edo Landetxeko leihatilan eman daiteke.
Ikastaroak eskaintzen dituenak saio praktikoak izango dira: bihotz geldialdi baten aurrean nola erantzun, egoera horiek nola antzeman, desfibriladorea nola erabili… Hala ere, esan dute osasun larrialdiez gain beste zenbait emergentzia egoera ere izango dituztela aztergai, hala nola sute baten aurrean eman beharreko pausuak ezagutzea eta su itzalgailu bat nola erabili ikastea.
