Pasaiako Jabetze Eskolaren ikasturte berria, berritasunez beterik
Ohiko eskaintzan zain, ikastaro eta tailer berrietan parte hartzeko aukera izango dute lau barrutietako emakumeek. Asteartean zabalduko dute izena emateko aukera.
![](https://oarsoaldea.hitza.eus/site/files/2024/03/jabetzeeskola.jpg)
Pasaiako Jabetze Eskola ikasturte berriari begira jarri da jada. Jakinarazi duenez, datorren astelehenean (hilak 9) zabalduko dute izena emateko epea, eta hilaren 24ra bitarte izango da horretarako aukera. 2024-2025 ikasturte honetan ere, programazio zabala, talde iraunkorrak, ikastaroak eta tailer berriak eskainiko dituzte.
Iaz 10 urte bete zituen eskolak hausnarketarako zein eraldaketa pertsonal eta kolektiborako gune izaten, arrakastaz gainera. Hasieratik, “autonomia indartzea, eskubideak bereganatzea, bizitzari indarrez eta konfiantzaz aurre egitea eta beste emakume batzuekin sareak sortzea” izan du helburu. Joan den ikasturtean 305 emakumek parte hartu zuten, urtez urte goraka doa.
Aurten ohiko jarduera askok jarraipena izango dutela aurreratu dute eskolako kideek, hala nola, mindfulness, zoru pelbikoa eta sexualitatea edota munduko emakumeen literaturaren inguruko ikastaroak. Beestalde, brikolajearen eta konponketen tailer trinkoa eta autozaintza emozionalari buruzko ikastaroa berreskuratuko dituztela jakinarazi dute. Emakume migratuen, zaintzaileen eta kirolarien taldeak ere bilduko dira ikasturte honetan, “egonkortutakoak” baitira jada eskolako iturrien arabera.
Berritasunez beterik dator ikasturte berria: jendaurrean gustura hitz egiten ikasteko ikastaroa eskainiko dute, Emakumeen ahotsak uhinetan izeneko podcast ikastaroa egingo dute estreinakoz eta azaroaren 25ari lotutako jarduera bereziak egingo dituzte.
Ikastaro zein tailerretan parte hartzeko aldez aurretik izena eman beharko da, aurrez aurre barruti guztietako HAZ bulegoetan edota lotura honetan bete behar da inprimakia.
Informazio eta xehetasun gehiago webgune honetan kontsulta daitezke.