Erdi Aroak hartuko du Oiartzun hilaren bukaeran
Erdi Aroko II. Jardunaldiak egingo dituzte hilaren 19tik 22ra. Erdi Aroko azoka eta buruzagi baskoien biltzarra ere egingo dituzte.
Iazko Erdi Aroko I. Jardunaldiko irudia da honakoa. Denbora mugatua dela diote batzuek. Behin igarotakoak ez omen du bueltarik. Bada, oiartzuarrek, ordea, martxan jarriko dute denboraren makina; izan ere, bigarrenez, Erdi Arora jauzi egiteko parada izango dute Oiartzungo Erdi Aroko II. Jardunaldiekin.
Iazkoan bi egunera mugatu zuten jarduera, baina oraingoan lau egunera luzatu dute. Irailaren 19tik 22ra izango da aurtengo egitasmoa, eta Iruñeko Erresumaren 1200. urteurrena izango du ardatz. Hain justu, 778. urtean bezala, 824an baskoiak berriro batu eta frankoak garaitu zituzten Orreagan, Eblo eta Aznar kondeak gidatutako zapalkuntza saio berriaren ondoren. Bigarren batasun hori bermatzeko baskoiak erresuma gisa antolatu eta Eneko Aritza errege aukeratu zuten, zortzi mendez independente mantenduko zen estatu propioari bide emanez. Horrelaxe laburtu dituzte Oiartzungo Erdi Aroko Jardunaldien antolatzaileek aurtengoaren nondik norakoak. “Data oso potoloa da, eta horrek duen garrantzia dela eta, ez dugu zalantzarik izan gaia aukeratzeko orduan”, esan dute.
“Euskal Herriko historiako pasarte konkretu hori aukeratzearekin erakutsi nahi dugu euskaldunok izan genuela gure estatu propioa, gure independentzia”, zehaztu dute antolatzaileek. Horren adibide jarri dute erromatar inperioaren hondamenditik baskoiak beti egon izan direla borrokan bisigodoen, frankoen eta musulmanen aurka. Kontatu dute 824. urtean baskoien batasuna sortu zela, frankoei Orreagan bigarren aldiz irabazi ondoren, eta une horretatik aurrera zortzi mendeko ibilbide bat hasi zela, zeinetan euskaldunak beren egitura propioekin batu ziren. Argi dute zer lortu nahi duten jardunaldiekin: Euskal Herriko historia zabaltzea, eta jai herrikoi batez gozatzea. Zabalkuntza prozesu horrek iaz izan zuen hasiera, XIV. mendean sinatu zuten Libourneko itunaren inguruan girotu baitzuten lehen jardunaldia.
Egitaraua
Irailaren 19an hasiko dira jardunaldiak, eta pasa den urtean bezalaxe, lehenengo ekintza Arizmendienean egingo den hitzaldi historikoa izango da: Iruñeko Erresuma: euskaldunok lehenengo estatu independentziarantz. Ostiralean (irailak 20) berriz, ekitaldi bakarra izango da, baina ez da nolanahikoa izango. Nafar Erresumaren historia musikatua kontzertua emango du Entrebescant Ensemble taldeak Landetxe Kultur Aretoan. Hamar abesti joko dituzte orotara, eta kontzertuan Nafarroako Erresumaren kronologia azalduko dute, pasarte esanguratsuenak azalduz eta musika tartekatuz.
Haatik, azoka eguna eta buruzagi baskoien biltzarra izango dira nagusi hilaren 21ean. Azoka plazan izango da goiz osoan zehar, eta, haurrek, gainera, izango dute Txikien Erresumaz gozatzeko aukera, Zimitiyuan —goizean izango da hori ere—. Hots, Oiartzungo bardoek ere izango dute haien lekua, bai eta Lur Korta ipuin kontalariak ere Txikien Erresuman. Eguerdian Orreagako garaileei harrera egingo diete, eta jarraian, arratsaldean, buruzagi baskoien iritsierarekin batera, gerlarien ezpata borroka erakustaldia eta biltzarraz gozatzeko aukera egongo da.
Erdi Aroko II. Jardunaldiak bukatzeko ardura Entrebescant Ensemble taldeak izango du hilaren 22ko 12:00etan, baina ez dute irailaren 20ko kontzertu berbera egingo, haurrentzat bideratua izango baita. Kontzertu didaktikoa izango da, eta, besteak beste, haurrei instrumentuen gaineko azalpenak emateaz arduratuko da Erdi Aroko musika taldea. Iazkoan jendeak izan zuen erantzuna ikusita, aurtengoan ere egitasmoak harrera ona izatea espero dute antolatzaileek.
