Pasaiako edukiontzi guztiak garbitu dituzte
Herriko 260 edukiontziak garbitu eta desinfektatu ditu San Marko mankomunitateak. Hiru hilean behin egiten dituzte lanak, udalaren eta mankomunitatearen akordioari esker.
Azken asteetan Pasaiako lau barrutietako edukiontzi guztiak garbitzen aritu dira San Marko mankomunitateko langileak. Teo Alberro alkateak jakinarazi duenez, organikoaren 69 edukiontziak, ontzi arinen 65ak, papera edota kartoiaren 66ak eta beiraren 59 igluak garbitu dituzte mankomunitateko langileek. Orotara, 260 izan dira garbitu eta desinfektatu dituztenak.
Lan hauek 3 hilean behin egiten dituzte, udalaren eta mankomunitatearen arteko akordioari esker. Honek zehazten duenez, mankomunitatearen ardura da edukiontzien kudeaketa.
Iraitz Pazos Zerbitzuetako zinegotziak adierazi bezala udal gobernuarentzat “oso garrantzitsua” da udalerriko edukiontzien “irlak ahalik eta txukunen eta garbien mantentzea”, baina hori lortzea askotan zaila izaten dela aitortu du. “Tamalez, oraindik ere badaude edukiontzien guneak errespetatzen ez dituzten herritarrak, euren zaborra edukiontzien gainean edo horietatik kanpo uzten dutenak. Pixkanaka jarrera horiekin amaitzen joan behar dugu, denon ardura baita Pasaia garbi eta txukun mantentzea”, esan du.
Bide batez, alkateak gogorarazi du tamaina handiko hondakinak eta altzariak atera baino lehen horiek uzteko kontsulta egin behar dela, “hondakin horiek ezin baitira edonon eta edozein unetan utzi, eta funtsezkoa baita ezarritako arauak errespetatzea”. Barruti guztietan seinaleztatuta daude altzari bilketako puntuak, eta tamaina handiko hondakinak egokitutako gune horietan utzi behar dira, barruti bakoitzari dagokion egun eta orduan: Trintxerpen astelehenean, San Pedron asteartean, Donibanen asteazkenean eta Antxon ostegunean. Informazio gehiago, lotura honetan.
