Bilboko erailketa matxista salatzera deitu du udalak
Erailketa matxista salatzeko mugimendu feministak egindako deialdiarekin bat egin du udalak.
Asteazkenean (hilak 11) Bilbon izandako erailketa matxista arbuiatu du Errenteriako Udalak. Aho batez, ordezkaritza duten talde guztiek adierazpen bat kaleratu dute, erailketa salatu eta biktimaren senide eta gertukoei elkartasuna adierazteko. Bide batez, gaur 19:00etan Niessenen egingo duten elkarretaratzera joateko deia egin du erakundeak.
Asteazken gauean izan zen hilketa matxista, Bilboko Santutxu auzoan. Ustez, haren bikotekidea da hiltzailea. Aurten indarkeria matxistak eraildako hirugarren emakumea da. 2003tik gaurdaino, 122 emakume eta 12 haur hil dituzte.
Ondorengoa da, hitzez hitz, udalak kaleratu duen adierazpena:
-
Errenteriako Udalak erabat gaitzesten du aste honetan Bilbon gertatutako erailketa matxista eta zero tolerantzia adierazten du eraso matxista guztien aurrean.
-
Horrelako gertaerak ez ditugu gure jendartean onartzen eta erakunde gisara lanean jarraituko dugu emakumeok indarkeria matxistarik gabe bizi gaitezen. Halaber, Errenteriako Udalak herritarrak gonbidatzen ditu, eta bereziki gizonezkoak, beren jokabide eta jarrerei arretaz erreparatzera eta edonolako erasoren aurrean jarrera aktiboz jokatzera.
-
Errenteriako Udaletik familiari gure elkartasunik beroena adierazi nahi diogu.
-
Udalak bat egiten du erailketa hori gaitzesteko Mugimendu Feministak gaur, irailak 13, 19:00etan Niessenen deitu duen mobilizazioarekin eta herritarrei bertan parte hartzeko gonbitea luzatzen die.
